Dr Tedros yasabye Perezida mushya wa Tanzania ubufatanye mu kurwanya Covid-19

Ni ubutumwa Dr Tedros yanditse ku rubuga rwa Twitter nyuma y’irahira rya Samia Suluhu nk’Umukuru w’Igihugu w’inzibacyuho, wasimbuye Dr John Pombe Magufuli wapfuye tariki ya 17 Werurwe 2021.

Dr Tedros yagize ati: “Ishyuka Perezida Samia Suluhu ku bwo kuba warahiye, ndetse n’abaturage ba Tanzania kuba babonye Perezida w’umugore wa mbere. Niteguye gukorana namwe mu kurinda abantu icyorezo cya Covid-19, kugihashya burundu no kugeza Tanzania ku buzima buzira umuze. Twese!”

Uyu muyobozi wa OMS asabye Perezida Suluhu ubufatanye mu kurwanya iki cyorezo, mu gihe Dr Magufuli we atemeraga bumwe mu buryo bwo kukirwanya bwashyizweho n’uyu muryango.

Uburyo bwo kurwanya no kwirinda Covid-19 Dr Magufuli atemeraga burimo gukoresha inkingo zakorewe i Burayi, muri Amerika n’ahandi. Mbere kandi yabwiraga abaturage ko bitari ngombwa ko bambara udupfukamunwa, gusa mu mpera za Gashyantare 2021 yabasabye ko bajya bambara utwakorewe iwabo.

Dr Magufuli yagaragaje ukwizera ubuvuzi n’ubwirinzi bw’iwabo; cyane cyane ubwa gakondo, akizera ko mu gihe buherekejwe n’amasengesho, nta kabuza iki cyorezo cya Covid-19.

Kurikira ibiganiro n’amavidewo binyura kuri Bwiza TV