Abasirikare batatu bahoze bakora muri Minisiteri y’Ingabo za Arabie Saoudite, bakatiwe urwo gupfa nyuma yo guhamwa n’ibyaha bikomeye by’ubugambanyi.
Minisiteri y’Ingabo ya Arabie Saoudite yatangaje ko iperereza ryayo ryasanze bariya bahoze ari abakozi bayo barakoze ibyaha bikomeye by’ubugambanyi bafatanyije n’abanzi b’igihugu, ibyangije inyungu z’ubwami bwa kiriya gihugu n’igisirikare cyabwo.
Ibiro ntaramakuru bya Arabie Saoudite (SPA) byatangaje ko Abakatiwe urwo gupfa bashinjwa ubugambanyi ari Mohammed bin Ahmed bin Yahya Akam, Shaher bin Isa bin Qasim Haqqawi, na Hamoud bin Ibrahim bin Ali Hazmi.
Minisiteri y’Ingabo muri Arabie Saoudite yavuze ko bariya basirikare bahamirijwe ibyaha imbere y’ubutabera, mbere y’uko hacibwa iteka ryaturutse ibwami ry’uko bagomba kwicwa.
