Amakipe atandatu yo mu gihugu cy’Ubwongereza ari mu yaherukaga gutangiza irushanwa rya UEFA Super League, yamaze gutangaza ko yitandukanyije na ryo nyuma yo kotswa igitutu n’abafana bayo.
Ku Cyumweru ni bwo amakipe 12 akomeye yo ku mugabane w’Uburayi yatangaje ko yitandukanyije n’amarushanwa ategurwa na UEFA, ahitamo gushinga ririya rushanwa rizajya riyahuza rizwi nka UEFA Super League.
Ku ikubitiro amakipe yari yemeye kuryitabira arimo AC Milan, Internazionale de Milano na Juventus yo mu Butaliyani.
Aya makipe kandi arimo Real Madrid, FC Barcelona na Atlético de Madrid yo muri Espagne; cyo kimwe na Manchester United, Manchester City, Liverpool, Chelsea, Arsenal na Tottenham Hotspur yo mu Bwongereza.
Abashinze iri rushanwa barangajwe imbere na Florentino Perez uyobora Real Madrid bavuga ko rije nk’igisubizo cyo kuzahura ubukungu bw’amakipe yabo bwashegeshwe n’ingaruka z’icyorezo cya Virusi ya Corona.
Ku rundi ruhande ariko abenshi mu bakunzi b’umupira w’amaguru bashinje ariya makipe kwironda, bagamije gukoresha ruhago mu nyungu zabo bwite.
Abafana b’amakipe atandukanye, amakipe ubwayo, abakinnyi, abayobozi b’amashyirahamwe y’Umupira w’amaguru ndetse n’abanyapoliti bose bahuje imbaraga, basaba ko ririya rushanwa ritabaho kuko ryaba rije kwica burundu umupira w’amaguru.
Mu bihugu nk’Ubwongereza usanga hari abafana bafite ibyapa birimo ibiriho amagambo agira ati: “[umupira] watangijwe n’abakene, wibwa n’abakire.”
Mu ijoro ryakeye ho ubwo ikipe ya Chelsea yari igiye kwakira Brighton mu mukino wa Shampiyona y’Ubwongereza, abafana bayo bakoreye imyigaragambyo ikomeye hanze ya Stade ya Stamford Bridge basaba ko ikipe yabo itakwitabira Super League.
Bamwe bati: “Abrahamovic [Umuherwe wa Chelsea] kora Ibintu bizima.”
Iki gitutu amakipe akomeje gushyirwaho cyatumye ay’inkwakuzi afata icyemezo cyo kwikura muri ririya rushanwa.
Abafashe umwanzuro mbere ni Manchester City na Chelsea, gusa BBC yatangaje ko Manchester United, Liverpool, Arsenal na Tottenham na zo zahise zitera intambwe yo kuva muri ririya rushanwa.
Bisobanuye ko mu makipe 12 yari yemeje gutangiza ririya rushanwa hasigayemo atandatu yonyine.
Ababikurikiranira hafi basanga kuba amakipe yo mu Bwongereza yikuye muri ririya rushanwa ari intsinzi ku mupira w’amaguru, kuko isaha n’isaha andi makipe na yo ashobora gusezera muri UEFA Super League.
