Mahamat Idriss Déby Itno uheruka gusimbura se Idriss Déby Itno wari perezida wa Chad nyuma yo gupfa, yatangaje abajenerali 15 akuriye bazamufasha kuyobora Tchad mu nzibacyuho y’amezi 18 ari imbere.
Uyu musirikare wo ku rwego rwa Jenerali w’inyenyeri enye, yari asanzwe akuriye umutwe urinda umukuru w’igihugu.
Abandi 14 bagize akanama ka gisirikare kazamufasha kuyobora Tchad na bo ni abasirikare ku rwego rwa jenerali, nk’uko biboneka mu itangazo ryasinywe kuwa kabiri na Gen Mahamat ubwe.
Abakuriye amashyaka ya politiki atavuga rumwe n’ubutegetsi babwiye BBC ko bo basaba ko ubutegetsi busubizwa abaturage, kuko ibyabaye ari ‘Coup d’Etat’.
Saleh Kebzabo w’ishyaka UNDR ryanze kwitabira amatora aheruka, yagize ati: “Nubwo igisirikare cyatangaje ko hazaba amatora bushya, dutekereza ko hakenewe ibiganiro ku rwego rw’igihugu…Tugomba gukurikiza itegekoshinga.”
Itegekoshinga rya Tchad rivuga ko mu ibura rya perezida umukuru w’inteko ishingamategeko ari we ufata ubutegetsi bw’inzibacyuho, inteko ya gisirikare yasheshe iyo nteko na guverinoma.
Succès Masra ukuriye ishyaka ‘Les Transformateurs’ wangiwe kwiyamamaza mu matora aheruka “kuko akiri mutoya mu myaka”, avuga ko bashaka inzibacyuho ya gisivili.
Ati: “Akazi k’igisirikare – na Bwana Kaka [Déby muto] ni ugukomeza kudufasha kurwanya iterabwoba…Ibi ni coup d’état. Turashaka gutegura inzibacyuho ya gisivili”.
Biteganyijwe ko imihango ku rwego rw’igihugu yo gushyingura Perezida Idriss Déby Itno izaba ku wa gatanu, nk’uko byatangajwe n’ibiro by’umukuru w’igihugu.
Kuri gahunda y’uwo munsi yatangajwe, iyi mihango izabanzirizwa n’akarasisi ka gisirikare, irimo kandi ijambo rizavugwa n’uwamusimbuye Gen Mahamat Idriss Déby.
Iryo tangazo rivuga ko hari abandi bakuru b’ibihugu batumiwe muri uwo muhango.
Kurikira ibiganiro n’amavidewo binyura kuri Bwiza TV
