Ikipe ya Manchester City yaraye yegukanye igikombe cya shampiyona y’Abongereza, nyuma y’uko Manchester United bari bagihanganiye itsinzwe na Leicester City.
Iyi kipe y’umutoza Pep Guardiola byari byitezwe ko itwara iki gikombe ku wa Gatandatu w’icyumweru gishize, gusa ntiyabigeraho nyuma yo gutsindwa na Chelsea ibitego 2-1.
Cyakora cyo gutsindwa na Chelsea ntacyo byahinduye cyane ku mahirwe y’iyi kipe, kuko yasabwaga gutsinda umukino umwe mu yari isigaye cyangwa Manchester United ikaba yatakaza.
Manchester City yegukanye igikombe nyuma y’uko Manchester United itsindiwe na Leicester City ku kibuga Old Trafford ibitego 2-1.
Luke Thomas ni we wafunguriye Leicester amazamu ku munota wa 10 w’umukino, Mason Greenwood yishyurira Manchester United ku wa 15 mbere y’uko Ça?lar SöyĂĽncĂĽ ahesha Leicester intsinzi ku munota wa 60.
Igikombe Manchester City yegukanye ni icya gatanu cya shampiyona itwaye mu mateka yayo, nyuma y’icyo yaherukaga gutwara Liverpool mu mwaka w’imikino wa 2018/19.
Byari ibyishimo bikomeye ku mutoza Pep Guardiola wegukanaga Premier league ya gatatu nk’umutoza wa Man City ndetse n’abakinnyi be.
Guardiola mu itangazo yasohoye yagize ati: “Mu bihe bikomeye turimo, ntidushobora kumva amajwi y’imbaga ituri inyuma nk’ibisanzwe, ariko tuzi ko babana natwe aho tujya hose kandi ibyo byaraduhetse.”
“[Abafana] ndabasezeranya ko twumva urukundo rwabo, turarushima kandi iyo rutabaho ntitwakabaye twarakoze ibyo twagezeho. Ndizera ko umunsi umwe tuzishimira hamwe bitari kera.”
“Ni umwaka wari ukomeye ku bantu benshi. Iki gikombe twagitwaye ku bw’abafana ndetse no ku bwa Colin Bell n’umuryango we.”
Colin Bell yakiniye Manchester imyaka 13 ayitsindira ibitego 152 mu mikino 492, mbere yo kwitaba Imana muri Mutarama 2021 ku myaka 74.
Kapiteni Fernandinho na we yunzemo ko bari bakumbuye abafana babo, bityo bakaba batwaye kiriya gikombe mu rwego rwo kubashimisha.
Manchester City yegukanye igikombe cya Shampiyona mu gihe ikibura imikino ibiri izayihuza n’amakipe ya Newcastle United na Brighton and Hove Albion; mbere yo guhura na Chelsea ku mukino wa nyuma wa UEFA Champions league.
Kurikira ibiganiro n’amavidewo binyura kuri Bwiza TV
