Ikipe y’igihugu ya Argentine, Albicelest, yageze ku mukino wa nyuma wa Copa America isezereye Cafeteros ya Colombia kuri penaliti 3-2.
Hiyambajwe za penaliti nyuma y’uko iminota isanzwe y’umukino yari yarangiye amakipe yombi anganya igitego 1-1.
Rutahizamu Lautaro Martinez ni we wafunguriye Argentine amazamu ku gitego cyo ku munota wa karindwi w’umukino, ku mupira yari ahawe na Lionel Messi wahise yuzuza itanu yavuyemo ibitego yatanze muri Copa America y’uyu mwaka.
Igitego cya Argentine cyakurikiwe no gusatira gukomeye ku ruhande rwa Colombia yateye igiti cy’izamu inshuro ebyiri, ari na ko umunyezamu Emiliano Martinez akuramo imipira ikomeye.
Colombia yatsinze igitego cyo kwishyura ku munota wa 61 w’umukino ibifashijwemo na Luis Díaz, nyuma yo kumara iminota 15 ya mbere y’igice cya kabiri yotsa igitutu izamu rya Argentine.
Lionel Messi na bagenzi be bihariye iminota 30 ya nyuma y’umukino, gusa bananirwa kubyaza umusaruro uburyo bukomeye babonye.
Muñoz wa Colombia yakoze ikosa ryo guha Ángel Di María umupira, na we awuhaye Lautaro ntiyashobora kuwutereka mu izamu yari yitegeye imbonankubone.
Ni na ko byagenze ubwo Di Maria yaheraga Messi umupira mu rubuga rw’amahina, arekuye ishoti umupira ugarurwa n’igiti cy’izamu.
Nyuma yo kurangiza iminota 90 y’umukino rwabuze gica, hahise hiyambazwa za Penaliti kugira ngo haboneke ikipe igera ku mukino wa nyuma.
Juan Cuadrado yateye penaliti ya mbere arayinjiza, akurikirwa na Messi na we wahise ayinjiza ku ruhande rwa Argentine.
Izi penaliti zakurikiwe n’izindi eshatu za Colombia zose zakuwemo n’umunyezamu Martinez.
Argentine izahurira ku mukino wa nyuma na Brésil uteganyijwe saa munani z’igicuku cyo ku cyumweru, ukazabera kuri Stade ya Maracanã mu mujyi wa Rio de Geneiro.
Iyi Brésil yo yabigezeho nyuma yo gusezerera Peru ku gitego 1-0.
