Umunyamabanga Mukuru w’Umuryango Mpuzamahanga w’ibihugu bikoresha ururimi rw’Igifaransa, Mme Louise Mushikiwabo, yamaganye yivuye inyuma iyicwa rya Jovenel Moïse wari Perezida wa Haïti.
Mushikiwabo yamaganye iyicwa rya Perezida wa Haïti anafata mu mugongo abaturage ba kiriya gihugu, mu butumwa yanyujije kuri Twitter ye.
Ati: “Nyuma y’inkuru y’iyicwa rya Perezida Jovenel Moïse, namaganye nivuye inyuma iki gikorwa kibi, kandi nihanganishije cyane abantu be ba hafi n’abaturage ba Haïti muri rusange.”
Mushikiwabo yunzemo ko La Francophonie yifashishije na Haïti muri ibi bihe bikomeye.
Ku gicamunsi cyo kuri uyu wa Gatatu ni bwo hamenyekanye inkuru y’uko Perezida wa Haïti yishwe arashwe n’abagizi ba nabi.
Minisitiri w’Intebe w’agateganyo wa kiriya gihugu, Dr Claude Joseph, mu itangazo yashyize hanze yavuze ko ahagana saa saba z’ijoro ryo ku wa Kabiri tariki 6 Nyakanga, itsinda ry’abantu batazwi ririmo abavuga Icyesipanyolo, bateye urugo rwa Perezida bakamukomeretsa ku buryo byamuviriyemo urupfu.
Yavuze ko umugore we yakomerekejwe n’isasu ariko ubu ari kwitabwaho mu buryo bwose bushoboka.
