Ishyirahamwe ry’Umupira w’Amaguru muri Zambia (FAZ), ryatangaje ko ryamaze gutandukana n’umunya-Serbia Milutin Sredojevic ‘Micho’ wari umutoza mukuru wa Zambia.
FAZ yatangaje ko yatandukanye n’uyu mugabo wahoze atoza ikipe y’igihugu ‘Amavubi’ ku bwumvikane, ku bw’inyungu z’impande zombi.
Iri shyirahamwe ryashimiye Micho ku kazi gakomeye yari amaze gukorera ikipe y’igihugu ya Zambia, rimwifuriza amahirwe masa mu buzima yakomerejemo.
Micho na we yemeje ko yamaze gutandukana na Zambia, ashimira FAZ ku bufasha yamuhaye mu gihe cy’akazi ke.
Ati: “Ndashimira abaturage ba Zambia, abakinnyi, abatoza, abayobozi n’abafana bamfashije mu buryo butandukanye mu gihe cyanjye. Ibihe byiza nagiranye na Chipolopolo nzabikoresha mu kazi kanjye kari imbere kandi ndagira ngo nifurize ibyiza Zambia.”
Milutin Micho yari umutoza wa Zambia kuva tariki ya 03 Gashyantare 2020, asimbuye Aggrey Chiyangi.
FAZ yatangaje ko mu gihe cya vuba ari bwo itangaza umusimbura w’uyu mugabo.
