Ikipe ya Moghreb Athletic Tétouan yo muri Maroc yaherukaga kumanuka mu cyiciro cya kabiri, yabonye itike yo guhagararira kiriya gihugu mu mukino ya CAF Confederation Cup nyuma yo kugera ku mukino w’Ishyirahamwe ry’Umupira w’amaguru muri kiriya gihugu.
Mu cyumweru gishize ni bwo iyi kipe yari yamanutse mu cyiciro cya kabiri nyuma yo gutsindwa na RS Berkane ibitego 3-2, mu mukino w’umunsi wa nyuma wa shampiyona ya Maroc.
Cyakora cyo n’ubwo Moghreb Tétouan yamaze kumanuka mu cyiciro cya kabiri, ntibizayibuza guhagararira Maroc mu mikino Nyafurika ihuza amakipe yatwaye ibikombe iwayo.
Ni nyuma yo kugera ku mukino wa nyuma wa Coupe du trône de football isezereye muri 1/2 cy’irangiza ikigugu Wydad Casablanca kuri penaliti 5-3; nyuma y’uko amakipe yombi yari yanganyije ibitego 2-2 mu mukino wabereye kuri Stade ya Marrakech ku Cyumweru.
Wydad Casablanca yasezerewe na Moghreb Tétouan ni yo iheruka kwegukana igikombe cya shampiyona ya Maroc.
Uretse iriya kipe izahagararira Maroc muri iriya mikino, indi kipe izahagararira iki gihugu ni FAR Rabat iheruka kwerekezwamo n’Umunyarwanda Imanishimwe Emmanuel bita Mangwende.
FAR Rabat yageze ku mukino wa nyuma wa Coupe du trône de football yatwaye inshuro 12 ari na wo wayihesheje iriya tike nyuma yo gusezerera Raja Béni Mellal ku gitego 1-0.
