Ikipe ya Manchester United ibifashijwemo cyane na Paul Pogba cyo kimwe na Bruno Fernandes, yatangiye neza shampiyona y’Abongereza nyuma yo kwihaniza Leeds United ikayitsinda ibitego 5-1.
Hari mu mukino w’umunsi wa mbere wa shampiyona wabereye kuri Stade ya Old Trafford.
Man United yakiniraga imbere y’abafana barenga 72,000 bari bagarutse muri Stade nyuma y’igihe kirekire, mu bitego bitanu yatsinze harimo bitatu byatsinzwe na Bruno Fernandes, mu gihe Umufaransa Paul Pogba yatanze imipira ine yavuyemo ibitego.
Umunota wa 30 w’umukino wari uhagije ngo Fernandes afungurire amazamu iriya kipe y’umutoza Ole Gunar Solskjaer, ndetse igitego cy’uriya munya-Portugal ni na cyo cyatandukanyije impande zombi mu gice cya kabiri cy’umukino.
Nyuma y’iminota itatu amakipe yombi agarutse mu gice cya kabiri cy’umukino, Leeds United yishyuye igitego yari yatsinzwe biciye kuri Luke Ayling, gusa Mason Greenwood ahita atsindira Man United igitego cya kabiri ku munota wa 52.
Man United yatsinze igitego cya gatatu ku munota wa 54 w’umukino binyuze kuri Bruno Fernandes wanatsinze icya kane ku munota wa 60, mbere y’uko Daniel James atsinda agashinguracumu ku munota wa 68 w’umukino.
Rutahizamu Jadon Sancho yinjiye mu kibuga asimbura muri uyu mukino yakiniraga bwa mbere Manchester United, nyuma yo kuyigeramo mu mpeshyi y’uyu mwaka avuye muri Borussia Dortmund.
Manchester United kandi kuri uyu mukino yerekanye myugariro Raphael Varane, nyuma yo kumusinyisha imuvanye mu kipe ya Real Madrid.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
