Umunya-Portugal Cristiano Ronaldo, yamaze gusubira mu kipe ya Manchester United yahozemo nyuma yo gutandukana na Juventus de Turin yo mu Butaliyani.
Cristiano w’imyaka 36 y’amavuko yasinye amasezerano y’imyaka ibiri muri Man United.
Mu gitondo cyo kuri uyu wa Gatanu ni bwo Ronaldo yasezeye bagenzi be bakinanaga muri Juventus, mbere yo gufata indege ye bwite akerekeza ahantu hatahise hamenyekana.
Masimiliano Allegri utoza ikipe ya Juventus, yabwiye itangazamakuru ko ejo hashize Cristiano yamumenyesheje ko “atagifite gahunda yo gukinira Juventus”, ikaba impamvu atamuhamagaye mu bakinnyi azifashisha ku mukino wa shampiyona uzahuza iriya kipe na Empoli.
Allegri yakomeje agira ati: “Ibintu birahinduka, ni ko ubuzima bumera. Juventus iracyahari, ari na cyo cy’ingenzi kurusha ibindi. Cristiano yatanze umusanzu we, ubwe yarigaragaje, ubu aragiye kandi ubuzima burakomeza.”
Umunyamakuru Fabrizio Romano usanzwe ari intyoza mu makuru ya za Transferts z’abakinnyi, yari yatangaje ko Cristiano Ronaldo ari mu muryango usubira muri Manchester United yakiniye kugeza muri 2009 ubwo yerekezaga muri Real Madrid.
Amakuru yavugaga ko Cristiano ashobora kwerekeza mu kipe ya Manchester City, gusa Romano yatangaje ko iyi kipe yamaze kuva mu irushanwa ryo gusinyisha uriya mukinnyi uri mu beza Isi ifite.
Ati: “Cristiano Ronaldo yabwiye Jorge Mendes (Agent we) ko yiteguye kujya muri Manchester United kuri Comeback idadanzwe.”
Uyu mugabo mu bundi butumwa yavuze ko “Manchester City yamaze kuva burundu mu biganiro byerekeye Cristiano Ronaldo. Bamaze no kubimenyesha Juventus na Jorge Mendes.”
Romano kandi yari yavuze ko ikipe ya Manchester United yamaze gutegura kontaro y’imyaka ibiri yamaze gushyikirizwa Jorge Mendes, ndetse Cristiano akaba yiteguye kuyemera kugira ngo asubire muri iriya kipe yahozemo.
Mu butumwa bundi uyu mugabo yanyujije kuri Twitter, yavuze ko Ronaldo na Manchester United bamaze kumvikana nyuma yo kwemera ibikubiye mu masezerano yahawe.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
