Ishyirahamwe riharanira uburenganzira bw’abanyamakuru batagira umupaka RSF (Reporters Sans Frontières), ryamaganye Perezida Evariste Ndayishimiye w’u Burundi kubera ibyo ryise ibitero akomeje gushyira ku munyamakuru Esdras Ndikumana.
Uyu munyamakuru ukorera Radiyo Mpuzamahanga y’Abafaransa (RFI) na Televiziyo ya France 24, asanzwe akomoka mu gihugu cy’u Burundi.
Kuri ubu aba mu buhungiro i Nairobi mu gihugu cya Kenya.
RSF yashinje Perezida Ndayishimiye kumugabaho ibitero, kubera ibyo yahishuye ku bwiyongere bukabije bw’icyorezo cya COVID-19 mu gihugu cy’u Burundi.
Iri shyirahamwe ribinyujije kuri Twitter yaryo ryagize riti: “RSF iramagana byimazeyo ibitero byisubiramo by’amagambo Perezida Gen Evariste Ndayishimiye agaba ku munyamakuru wa RFI, Esdras Ndikumana, ushinjwa guhungabanya umutekano kubera ibyo yahishuye ku bwiyongere bwa COVID-19 mu gihugu.”
Iri shyirahamwe ryashinje Ndayishimiye kugaba ibitero kuri uriya munyamakuru, nyuma y’uko mu kwezi gushize yari yavuze ko arimo kwiyahura kubera amagambo ye, kuko u Burundi butugarijwe n’icyorezo cya Covid-19 nk’uko abivuga.
Umukuru w’Igihugu cy’u Burundi yabivuze ubwo yari ayoboye umuhango wo gusezera ku Barundi baba mu mahanga bari basuye icyo gihugu, wabereye i Bujumbura ku wa 20 Kanama 2021.
Perezida w’u Burundi yashinje Esdras Ndikumana gutangaza ko u Burundi bwugarijwe na Covid-19 mu buryo budasanzwe, nyamara abayobozi bo muri iki gihugu bemeza ko ubwandu bwayo mu gihugu ari buke.
Ati: “Hari Umurundi ubabajwe n’uko Covid-19 itaratwugariza, muhora mumwumva ku maradiyo! Avugira kuri RFI ababaye ngira ngo arimo kwiyahura kubera ko Covid-19 itarugariza Abarundi.”
Yavuze ko uyu munyamakuru ari we wenyine usigaye “yifuza ko Abarundi bagwa mu manga, bamarana bapfa”, yungamo ko atari we uzarota COVID-19 igeze neza mu gihugu ngo ibazahaze.
Yunzemo ko Abarundi ntacyo bazaba kuko Imana ihari.
Ishyirahamwe RSF mu butumwa bwaryo, ryasabye Perezida w’u Burundi “kurwanya icyorezo aho kurwanya abanyamakuru.”
Ryamubwiye ko kwica uburenganzira bw’itangazamakuru mu gihe hari ikibazo cyerekeye ubuzima ari ugutanga umusanzu wo guca intege abarajwe ishinga no kurwanya iriya virusi.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
