Abasirikare baheruka guhirika ku butegetsi Alpha Condé wahoze ari Perezida wa Guinée-Conakry, barekuye abanyeporitike hafi 20 batavugaga rumwe n’ubutegetsi bwa kiriya gihugu bari bamaze igihe bafunzwe.
Ku Cyumweru gishize ni bwo igisirikare cya Guinée kirangajwe imbere na Lt Col Mamady Doumbouya wahoze akuriye umutwe w’ingabo zidasanzwe, cyahiritse Perezida Condé ku butegetsi mbere yo gutangaza ko kigiye kwihutisha gahunda yo kurekura imfungwa za Politiki muri kiriya gihugu.
Ni mu gihe ibihugu byo mu muryango w’ibihugu byo muri Afurika y’Iburengerazuba (ECOWAS/CEDEAO) biri mu myiteguro yo kuganira ku kibazo cya Guinée.
Perezida Alpha Condé yari yarafunze abatavuga rumwe n’ubutegetsi bwe babarirwa mu icumi, nyuma y’imvururu zakurikiye amatora yabaye mu mwaka ushize gusa ntavugweho rumwe.
Umunyamakuru wa AFP dukesha iyi nkuru yatangaje ko yiboneye n’amaso ye abagera kuri 20 bafunguwe muri gereza yo mu murwa mukuru Conakry ku mugoroba wo ku wa Kabiri, barimo n’abatavuga rumwe n’ubutegetsi.
Abunganizi mu mategeko bahagarariye imbohe za Politiki muri Guinée bavuga ko abantu 79 ari bo bari ku rutonde rw’abarekurwa nyuma yo kuganira n’igisirikare.
Ku wa Mbere w’iki Cyumweru Igisirikare cya Guinée cyari cyasohoye itangazo risaba Minisiteri y’Ubutabera kurekura abanyepolitiki bose bari baratawe muri yombi.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
