Ikipe ya Manchester United ibifashijwemo cyane na Cristiano Ronaldo, yanyagiye New Castle United ibitego 4-1 mu mukino wa mbere uyu munya-Portugal yayikiniraga.
Iyi kipe y’umutoza Ole Gunnar Soskjaer yari yakiriye New Castle mu mukino w’umunsi wa kane wa shampiyona y’Abongereza.
Ni umukino abafana ba Manchester United bari bategerezanyije amatsiko menshi, buri wese yifuza kureba uko Cristiano yitwara nyuma yo kuva kuri kiriya kibuga nk’umwami mu myaka 12 ishize.
Umunota wa 45+2 w’umukono wari uhagije ngo Cristiano Ronaldo afungurire Manchester United amazamu, nyuma yo kubyaza umusaruro amakosa yari akozwe n’umunyezamu Freddie Woodman wa New Castle.
Iki gitego ni cyo cyatandukanyije impande zombi mu gice cya mbere cy’umukino, mbere y’uko Javier Manquillo yishyurira New Castle ku munota wa 56 w’umukino.
Cristiano wigaragaje cyane yongeye guhagurutsa ibihumbi by’abafana ba Manchester United bari buzuye Old Trafford nyuma y’iminota umunani, nyuma y’uko Luke Shaw yari azamukanye umupira akawumucomekera, undi agasiga ba myugariro ba New Castle mbere yo kuwutereka mu izamu.
Manchester United yatsinze igitego cya gatatu ku ishoti rikomeye rya Bruno Fernandes ryo ku munota wa 80, mbere y’uko Jesse Lingard wari winjiye mu kibuga asimbura atsinda agashinguracumu ku munota wa 93.
Gutsinda New Castle byatumye Manchester United ifata umwanya wa mbere n’amanota 10, ikaba irusha rimwe Manchester City ya kabiri.
