Ukuriye ishyirahamwe ry’impunzi z’Abanyarwanda muri Mozambique, Cleophas Habiyaremye, yavuze ko iyicwa rya Karemangingo ryongereye ubwoba kuri izo mpunzi muri Mozambique.
Habiyaremye avuga ko uretse ubwoba ahanini buri mu mpunzi z’Abanyarwanda muri Mozambique, buva ku ibura kwa Cassien Ntamuhanga wari wafashwe na polisi mu mezi atatu ashize, gusimbuka urupfu kw’umunyamabanga w’iryo shyirahamwe mu byumweru bitatu bishize, no kwicwa kwa Karemangingo wari ushinzwe umutungo muri iryo shyirahamwe ry’impunzi. Ishami rya UN/ONU rishinzwe impunzi muri Mozambique naryo ryasabye “iperereza rihuse kandi ryimbitse” ku bwicanyi kuri Revocat Karemangingo nk’uko inkuru ya BBC ivuga. Prof. Adriano Nuvunga ukuriye ihuriro ry’imiryango iharanira uburenganzira bwa muntu muri Mozambique (RMDDH) yatanze ubutumwa bwamagana iyicwa rya Karemangingo. Ati: “Turamagana kandi abicanyi bagambirira impunzi z’Abanyarwanda. Mozambique ifite inshingano zo kurinda buri munyarwanda uba muri iki gihugu.” Nuvunga yasabye abategetsi b’iki gihugu “gukora iperereza no kugeza imbere y’ubucamanza abakoze ubu bwicanyi”. Karemangingo wabaga muri Mozambique nk’impunzi wishwe kuwa mbere nimugoroba arashyingurwa kuri uyu wa 17 Nzeri, nk’uko bamwe mu bo mu muryango we babivuga. Uyu mugabo w’imyaka 54 asize abana barindwi. Ukuriye ishyirahamwe ry’impunzi z’Abanyarwanda muri Mozambique, Cleophas Habiyaremye, yari aheutse kubwira BBC ko kubera bamwe bagenda barusimbuka, bafite ubwoba ko hari n’abandi bashobora kwicwa mu minsi iri imbere. Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
