Ikipe y’Igihugu ya Guinée-Conakry, Syli National, yamaze kugera i Yaoundé muri Caméroun aho yitabiriye imikino y’Igikombe cya Afurika cya 2021.
Abagize ikipe ya Guinée bageze i Yaoundé bakubutse hano i Kigali, aho bari bamaze hafi icyumweru bakorera umwiherero.
Ni umwiherero wasize Guinée ikinnye imikino ibiri ya gicuti n’Amavubi y’u Rwanda, umwe iwutsindwamo ibitego 3-0 mu gihe undi yawutsinze ku bitego 2-0.
Amafoto ishyirahamwe ry’umupira w’amaguru muri Guinée ryashyize kuri Twitter yerekana abakinnyi b’iyi kipe bamaze kugera muri Caméroun.
Guinée iri mu tsinda rya kabiri isangiye n’Ikipe y’Igihugu ya Sénégal, iya Zimbabwe n’iya Malawi.
Iyi kipe y’umutoza Kaba Diawara izaseruka bwa mbere mu gikombe cya Afurika ihura na The Warriors ya Zimbabwe ku wa Mbere tariki ya 10 Mutarama.
