Ikipe ya FC Barcelona yo mu gihugu cya Espagne, yemeje ko Xavi Hernández yayigarutsemo nk’umutoza wayo mukuru nyuma y’imyaka itandatu yari ishize ayisezeyeho.
Xavi wamenyekanye nka El Maestro kubera ubuhanga budasanzwe yari afite mu guconga ruhago, yakiniye FC Barcelona hagati ya 1998 na 2015, mbere yo kwerekeza muri Al Sadd yo muri Qatar yakiniye akanabera umutoza.
FC Barcelona ni yo kipe yazamukiyemo nyuma yo kurererwa mu ishuri ryayo ry’umupira w’amaguru rya La Masia.
Al Sadd mu gihe yari ayimazemo nk’umutoza, yari amaze gutwarana na yo ibikombe birindwi by’amarushanwa atandukanye.
FC Barcelona yemeje ko Xavi wayibereye Kapiteni yayigarutsemo nk’umutoza kugeza muri 2024, mu itangazo yanyujije ku rubuga rwayo.
Iti: “FC Barcelona yageze ku bwumvikane na Xavi Hernández bwo kuyibera umutoza mu gihe gisigaye muri uyu mwaka w’imikino ndetse n’indi myaka ibiri iri imbere.”
Iyi kipe yavuze ko agera i Barcelona muri iyi Weekend, mbere yo kwerekanwa ku mugaragaro ku wa Mbere tariki ya 08 Ugushyingo.
FC Barcelona yemeje Xavi Hernández nk’umutoza wayo nyuma y’amasaha make Al Sadd yatozaga itangaje ko yageze ku bwumvikane na Barça bwemerera Xavi kuba umutoza wayo.
Iti: “Ubuyobozi bwa Al Sadd bwemeye igenda rya Xavi muri FC Barcelona nyuma yo kwishyura ingingo ikubiye mu masezerano amurekura atarangije amasezerano. Twemeranyije ubufatanye na FC Barcelona mu gihe kiri imbere.”
Xavi nk’umukinnyi wa FC Barcelona yayikiniye imikino 767 mu myaka 17 yayikiniye, batwarana ibikombe 25 birimo umunani bya shampiyona ya Espagne na bine bya UEFA Champions league.
Aza ku mwanya wa kabiri mu bakinnyi bakiniye FC Barcelona imikino myinshi mu mateka yayo, nyuma y’igihangange Lionel Messi.
Xavi ufatwa nk’umwe mu bakinnyi beza b’ibihe byose bakina hagati mu kibuga babayeho, yaje gusimbura muri FC Barcelona Umuholandi Ronald Koeman uheruka kwirukanwa.
