Ikipe ya Manchester City yiyongereye mu makipe azakina 1/8 cy’irangiza cya UEFA Champions league, nyuma yo gutsinda PSG iyirusha ibitego 2-1.
Iyi kipe y’umutoza Pep Guardiola yari yakiriye PSG ku kibuga cya Stade ya El Etihad, mu mukino ubanziriza uwa nyuma wo mu tsinda A.
Ni nyuma y’ubanza amakipe yombi yari yarahuriyemo i Parc des Princes mu Bufaransa PSG yatsinze ku bitego 2-0.
Manchester City yatangiye umukino yotsa igitutu PSG, buri kanya iri imbere y’izamu ryayo.
Buri kanya abarimo Riyad Mahrez bahinduraga imipira imbere y’izamu rya PSG, bikaba ngombwa ko iyi kipe irokorwa n’umunyezamu Keylor Navas wakuyemo imipira myinshi cyangwa ba myugariro bari imbere ye.
Ba myugariro Presnel Kimpembe na Achraf Hakimi bagiye bakiza izamu n’umutwe ku bitego byabaga byabazwe, mu gihe umupira wa Kapiteni Ikary GĂĽndogan wagaruwe n’igiti cy’izamu.
Nyuma y’iminota 45 y’igice cya mbere yarangiye amakipe yombi anganya 0-0, PSG yayoboye umukino ku munota wa 50 binyuze kuri Kylian MbappĂ©.
Hari ku mupira wari wabanje gukinwa na Neymar na Messi batigeze bagaragara muri uyu mukino, mbere yo kugera kuri MbappĂ© wahise awutereka mu izamu abanje kuwunyuma mu maguru y’umunyezamu Ederson MorĂŁes.
Byasabye umunota wa 63 w’umukino ngo Manchester City igombore biciye kuri Raheem Sterling wari uhawe umupira na Kyle Walker, mbere y’uko Gabriel Jesus winjiye mu kibuga asimbura Zichenko atsinda igitego cy’intsinzi cyo ku munota wa 76.
Gutsinda uyu mukino byatumye Manchester City iyobora itsinda A n’amanota 12 mbere yo gusura Leipzig yo mu Budage mu mukino wa nyuma wo mu tsinda.
PSG yo iri ku mwanya wa kabiri n’amanota umunani mbere yo kwakira i Parc des Princes Club Brugge yo mu Bubiligi yanyagiwe na Leipzig ibitego 5-0.
Uko indi mikino yakinwe kuri uyu wa Gatatu yagenze
