Umutoza Masudi Djuma w’ikipe ya Rayon Sports yakomeje kujya mu mazi abira, nyuma y’uko iyi kipe itsinzwe na Kiyovu Sports ibitego 2-0.
Hari mu mukino w’umunsi wa karindwi wa shampiyona wabereye kuri Stade ya Kigali i Nyamirambo.
Ibitego bya Ishimwe Kevin na Emmanuel Okwi byari bihagije kugira ngo Kiyovu Sports ikure amanota atatu kuri mukeba wayo Rayon Sports, inahita ifata umwanya wa mbere by’agateganyo n’amanota 16.
Kuri ubu igitutu gikomeje kuba kinshi ku mutoza Masudi Djuma wa Rayon Sports, kubera umusaruro mubi iyi kipe ikomeje kugira.
Rayon Sports kuri ubu ifite amanota 11 yonyine, mu mikino irindwi ya shampiyona imaze gukina.
Iyi kipe imaze gutakaza amanota 10 muri shampiyona, yashoboye gutsinda imikino itatu yonyine, itsindwa ibiri mu gihe yananganyije indi ibiri.
