Ingabo za Uganda, UPDF, kuwa Gatanu zambutse umugezi wa Semiliki, zinjira muri ako gace gafatwa nk’amatware ya ADF. Iki gikorwa gifatwa nk’intambwe ikomeye mu guhashya ADF kigezweho nyuma yo kuyimishaho urufaya rw’amasasu y’indege zirwanira mu kirere n’amabombe y’imbunda rutura kuwa 30 Ugushyingo 2021, igakwira imishwaro. Kubera ikibazo cy’imihanda, UPDF yari yabanje gukambika ahitwa Mikakati, mu birometero icyenda uvuye ku kiraro cya Semiliki. Aya makuru yemejwe n’ushinzwe amakuru ya gisirikare muri UPDF, Col Paddy Ankunda. Yagize ati ” UPDF yageze ku kiraro cya Semiliki muri RDC. Ubu guhiga ADF biratangiye.” Nyuma y’ibi bitero, bivugwa ko umuyobozi wa ADF, Musa Baluku yaburiwe irengero. Hari n’amakuru ko FARDC na UPDF baba bafashe abarwanyi 34 ba ADF mu gihe abandi basabwe kumanika amaboko. Abakongomani 31 bari bafashwe bugwate na ADF bararekuwe mu gihe inkambi za gisirikare za ADF enye: Kambi Yayu, Tondoli, Belu 1 and Belu 2, na Madina (kabambe) zasenywe.
