Umutoza Ruremesha Emmanuel yahagaritswe na Mukura VS

Ikipe ya Mukura VS kuri uyu wa Mbere yahagaritse igihe kitazwi umutoza wayo mukuru, Ruremesha Emmanuel.

Amakuru y’ihagarikwa rya Ruremesha yemejwe na Perezida wa Mukura VS, Sakindi Eugène, gusa ntiyatangaza impamvu bafashe kiriya cyemezo.

Umutoza Ruremesha yahagaritswe nyuma y’umunsi umwe ikipe ye itsinzwe na Kiyovu Sports ibitego 2-1, mu mukino w’umunsi wa cyenda wa shampiyona wabereye kuri Stade ya Huye.

Gutsindwa na Kiyovu Sports byatumye Mukura VS ifata umwanya wa cyenda n’amanota 10, gusa ikaba igifite umukino w’ikirarane igomba guhuriramo na APR FC.

Hari amakuru avuga ko Ruremesha yahagaritswe ashinjwa kugira uruhare mu gutsindwa na Kiyovu Sports yabayemo mu mwaka ushize w’imikino.

Ku munsi wa 10 wa Shampiyona uzakinwa ku wa Gatatu, tariki ya 22 Ukuboza, iyi kipe yo mu Majyepfo izakirwa na Gorilla FC.

Ruremesha Emmanuel yari Umutoza wa Mukura VS kuva muri Nyakanga uyu mwaka ubwo yasinyaga amasezerano y’imyaka ibiri.

Uyu mutoza agihagarikwa yahise yiyongera kuri Masudi Djuma na we wahagaritswe igihe kitazwi na Rayon Sports.

Mu gihe bombi baba birukanwe, bahita biyongera ku bandi batoza bamaze kwirukanwa mu makipe yabo barimo umunya-Guinée Sekou Sampore watozaga Gorilla FC, Habimana Sosthène watozaga Etincelles na Eric Nshimiyimana uherutse kwirukanwa na AS Kigali.