Madamu wa Perezida Macron agiye kujyana mu nkiko abavuze ko yavukanye ubugabo

Madamu wa Perezida Emmanuel Macron w’u Bufaransa, Brigitte Macron, yatangaje ko agiye kugeza imbere y’ubutabera abakwirakwije inkuru z’uko yavutse ari umuhungu nyuma akihinduza igitsina.

Muri Nzeri uyu mwaka ni bwo Brigitte Macron yibasiwe n’abakoresha imbuga nkoranyambaga bavuga ko yavukanye ubugabo.

Byari nyuma y’inkuru yari yanditswe ku rubuga rw’abanyapolitiki bagendera ku myumvire ya kera (extrême droite), mbere yo gusamirwa hejuru n’abarwanya umugabo we babikwirakwije ku mbuga nkoranyambaga.

Aba bavugaga ko Brigitte Macron yavutse ari umuhungu ndetse yitwa Jean-Michel Trogneux.

Umwunganizi mu mategeko wa Madamu Brigitte, Jean Ennochi, yabwiye AFP dukesha iyi nkuru ko bamaze gutegura ikirego bagomba gushyikiriza ubutabera.

Yavuze Madamu wa Macron “yafashe icyemezo cyo gutanga ikirego, kandi biri mu nzira.”

Si bwo bwa mbere Brigitte Macron yari yibasiwe kuva umugabo we yatorerwa kuyobora u Bufaransa muri 2017, dore ko yakunze gushinjwa kenshi kurongorwa n’umugabo arusha imyaka 25 y’amavuko.

Kuri iyi nshuro uyu mugore yongeye kwibasirwa mu gihe u Bufaransa bwitegurira amatora y’umukuru w’igihugu ateganyijwe mu mwaka utaha wa 2022.

Perezida Macron ntaratangaza ku mugaragaro ko aziyamamariza Manda ya kabiri, gusa abatari bake biteze ko aziyamamaza.

azokwitoreza ikiringo kigira kabiri, ariko abatari bake ni vyo biteze.

Macron azaba ahanganye na Valérie Pécresse, umukandida wo ku ruhande rwa extrême droite wo mu ishyaka ry’aba Republicain cyo kimwe na Eric Zemmour, umunyamakuru wo kuri Televiziyo uzwi cyane mu Bufaransa.