Perezida Paul Kagame uri i Dakar muri Sénégal kuri uyu wa Kabiri yakiriwe ku meza ari hamwe n’abanyacyubahiro batandukanye, mbere yo gutaha Stade ya Abdoulaye Wade.
Ku mugoroba wo kuri uyu wa Kabiri ni bwo iriya Stade y’akataraboneka itahwa ku mugaragaro, mu birori byitabirwa n’abanyacyubahiro batandukanye barimo abakuru b’ibihugu na za Guverinoma ndetse n’abakanyujijeho muri ruhago.
Ni Stade yubatse i Diamniadio, ikaba ifite ubushobozi bwo kwakira abafana babarirwa mu bihumbi 50.
Mbere y’uko umuhango wo gutaha iyi Stade uba Perezida Kagame n’abandi banyacyubahiro batandukanye bakiriwe ku meza na Perezida Macky Sall wa Sénégal, mu muhango wabereye ku ngoro ye.
Abandi banyacyubahiro bitabiriye uriya musangiro barimo Perezida Recep Tayyip Erdogan wa Turkiya, Perezida Gianni Infantino wa FIFA, Perezida George Weah wa Liberia, Frank-Walter Steinmeier w’u Budage, Adama Barrow wa Gambia na Umaro Sissoco wa Guinée-Bissau.
Stade ya Abdoulaye Wade iri mu zigezweho umugabane wa Afurika ifite yuzuye itwaye akayabo ka miliyoni 269 z’amadorali ya Amerika, bikaba byitezwe ko igomba kwakira imikino Olempike y’abato yo muri 2026 izaba ibera ku butaka bwa Afurika ku nshuro ya mbere.
