Ikipe ya AS FAR ikinamo ba myugariro b’Abanyarwanda, Imanishimwe Emmanuel ‘Mangwende’ na Manzi Thierry, yongeye kubona amanota atatu nyuma y’imikino itanu yikurikiranya yari imaze idatsinda.
Iyi kipe y’Ingabo z’ubwami bwa Maroc yongeye kubona amanota atatu nyuma yo gutsinda Difaa El Jadida ibitego 3-1, mu mukino w’umunsi wa 19 wa shampiyona.
Ibitego bibiri bya Ismael Khafi n’icya Reda Slim cyo kuri Penaliti ni byo byafashije FAR Rabat yakiniraga imbere y’abafana bayo kwegukana amanota atatu y’uriya mukino.
Imanishimwe Emmanuel nk’ibisanzwe yari yabanje muri uyu mukino. Manzi Thierry bwa mbere na we yari yabanje mu kibuga kuva yagera muri iriya kipe mu mpera z’ukwezi gushize avuye muri FC Dila Gori yo mu cyiciro cya mbere muri Georgia yari amaze amezi atandatu akinira.
Gutsinda uyu mukino byafashije AS FAR kuva ku mwanya wa munani ifata uwa gatanu n’amanota 28 inganya n’amakipe abiri ayiri imbere.
Simba SC ya Kagere yo yatsindiwe muri Maroc
Mu gihe Manzi Thierry na Mangwende bitwaraga neza, Simba Sports Club yo muri Tanzania yo yatsindirwaga muri Maroc irushwa ibitego 2-0.
Iyi kipe y’Umunyarwanda Meddie Kagere yari yasuye RS Berkane, mu mukino wa gatatu w’itsinda wa CAF Confederation Cup.
Ibitego byo mu gice cya mbere cy’umukino bya Adama Ba na Charki El Bahri ni byo byafashije Berkane y’umutoza Florent IbengĂ© gutsinda uyu mukino.
Rutahizamu Meddie Kagere ntiyigeze awugaragaramo n’ubwo yari mu bakinnyi 18 bari bawiyambajwemo.
Gutsindwa na Berkane byatumye Simba ifata umwanya wa kabiri mu tsinda rya kane iherereyemo n’amanota ane, irushwa abiri na Berkane iriyiboye.
