Ukraine irigamba kwica undi mujenerali w’u Burusiya

Urwego rushinzwe ubutasi bwa gisirikare muri Ukraine, rwatangaje ko Ingabo z’iki gihugu ziheruka kwicira ku rugamba undi musirikare w’u Burusiya wo ku rwego rwa Jenerali.

Uwo Ukraine ivuga ko iheruka kwivugana ni Maj Gen Vitaly Gerasimov. Ubutasi bwa Ukraine buvuga yishwe ku itariki ya 04 Werurwe arasiwe mu mirwano yabereye hafi y’umujyi wa Kharkiv.

Ni imirwano bivugwa ko yanaguyemo abandi bakomeye ku ruhande rw’u Burusiya.

Maj Gen Gerasimov uheruka kwicwa, ni umwe mu basirikare bafite izina rikomeye mu Burusiya. Azwiho kuba yararwanye intambara ya Chechen yasakiranyije u Burusiya na Chechnya, yambikwa umudari w’ishimwe ku bwo gufata umwigimbakirwa wa Crimea.

Uyu mujenerali yishwe mu gihe kitageze ku cyumweru undi musirikare w’Umurusiya na we ufite ipeti rya Maj Gen witwa Andrei Sukhovetsky arashwe na mudahusha w’umunya-Ukraine ku wa 28 Werurwe.

Undi mujenerali w’Umurusiya waguye mu ntambara yo muri Ukraine ni Magmed Tushayev wo mu bacanshuro b’Aba Chechen bari gufasha u Burusiya muri iriya ntambara.

Kugeza kuri uyu wa Kabiri Ukraine yavugaga ko imaze kwivugana abasirikare b’Abarusiya barenga ibihumbi 12.

Yavugaga kandi ko imaze guhanura indege zabwo z’intambara 48, za kajugujugu 80, ibifaru bibarirwa muri 300, imizinga 120 ndetse n’ibindi bikoresho byinshi bya gisirikare.

U Burusiya kuva bwatangaza ko bumaze gutakariza muri Ukraine abasirikare 498 nta yandi makuru buratangaza ku byo bumaze gutakaza.