Kapiteni w’ikipe ya Manchester United, Harry Maguire, yibasiwe bikomeye n’abafana b’ikipe y’iki kipe nyuma y’umukino wa Shampiyona y’Abongereza yanyagiwemo na Manchester City ibitego 4-1.
Manchester United yari yasuye Manchester City mu mukino wa 186 wa Derby y’i Manchester.
Umunota wa gatanu w’umukino wari uhagije ngo City y’umutoza Pep Guardiola ifungure amazamu ibifashijwemo na Kevin De Bruyne.
Manchester United nyuma yo guhusha uburyo bukomeye biciye kuri Fred, yishyuye iki gitego ku munota wa 22 w’umukino ibifashijwemo na Jadon Sancho, gusa Man City yongera kuyobora umukino nyuma y’iminota itandatu nanone biciye kuri De Bruyne.
Igice cya kabiri cy’umukino cyose cyihariwe n’ikipe ya Manchester City yagiye ibona uburyo bwinshi bw’ibitego, gusa bikaba ngombwa ko umunyezamu David de Gea arokora Manchester United.
Byasabye umunota wa nyuma 68 w’umukino ngo Riyad Mahrez atsindire Manchester City igitego cya gatatu, mbere y’uko uyu munya-Algeria ayitsindira agashinguracumu ku munota wa 90.
Myugariro Harry Maguire ni umwe mu bakinnyi ba Manchester United bagaragaje urwego rwo hasi cyane muri uyu mukino.
Abafana ba Manchester United bamushinja kuba byibura yagize uruhare mu bitego bitatu muri bine batsinzwe.
Nko ku gitego cya mbere bamushinje kuba ishoti rya De Bruyne ryabanje kumuca mu maguru mbere yo kuruhukira mu izamu rya David de Gea. Bamushinje kandi kugira uruhare mu gutuma Man City yubaka uburyo bwavuyemo igitego cya kabiri, ndetse no kuyobya umupira watumye batsindwa igitego cya gatatu.
Ku mbuga nkoranyambaga abafana ba Manchester United bahurije ku kuba urwego Harry Maguire ariho rudahwanye na miliyoni 80 z’ama-Pounds Manchester United yamuguze muri Leicester City, bati: “Ubu ni bwo bujura bukomeye bwabayeho mu mateka y’umupira w’amaguru.”
Abenshi mu bafana kandi basabye ko Maguire atakomeza kubabera Kapiteni.
Gutsinda uyu mukino byatumye Manchester City ikomeza kuyobora shampiyona n’amanota 69, ikaba yongeye gusubizaho ikinyuranyo cy’amanota atandatu ayitandukanya na Liverpool iyikurikiye.
