Ikipe ya FC Barcelone yanyagiye Real Madrid ibitego 4-0, mu mukino wa shampiyona ya Espagne amakipe yombi yari yahuriyemo mu ijoro ryakeye.
FC Barcelone yari yasuye Real Madrid i Santiago Bernabeu, mu mukino w’umunsi wa 29 wa shampiyona ya Espagne wari utegerejwe n’Isi yose.
Ni Barcelone yari imaze imyaka itatu idatsinda Real Madrid, dore ko yabiherukaga muri 2019 ubwo Ivan Rakitic yayifashaga kuyitsindira i Bernabeu igitego 1-0.
Nyuma y’aho imikino itanu yahuje amakipe yombi nta n’umwe FC Barcelone yari yarashoboye gutsinda.
Umunya-Gabon Pierre-Emerick Aubameyang ni we wafunguye amazamu ku munota wa 29 w’umukino, ku mupira yahawe na Ousmane Dembele mbere yo kuwutereka mu izamu rya Thibaut Courtois.
Real Madrid yaburaga rutahizamu Karim Benzema wari ufite imvune, yatsinzwe igitego cya kabiri nyuma y’iminota icyenda, ku mupira waturutse muri koruneri mbere y’uko myugariro
yatsinze ibitego Ronald Araujo awutereka mu nshundura n’umutwe.
FC Barcelone yatangiye igice cya kabiri isatira cyane ndetse ihita inabona igitego cya gatatu cyatsinzwe na Ferran Torres wari uhawe umupira mwiza na Aubameyang, mbere y’uko uyu munya-Gabon atsinda agashinguracumu ku munota wa 51.
Ni igitego cyabanje kwangwa bavuga ko habanje kubaho kurarira, gusa kiza kwemerwa nyuma yo kwifashisha ikoranabuhanga rya VAR.
Aubameyang yahise yuzuza ibitego icyenda amaze gutsindira FC Barcelone mu mikino 11 amaze kuyikinira, kuva yayigeramo muri Mutarama uyu mwaka avuye muri Arsenal yo mu Bwongereza.
FC Barcelone yari hejuru cyane yashoboraga kubona ibindi bitego, gusa Real Madrid igenda irokorwa n’umunyezamu Thibaut Courtois.
Mu gihe Shampiyona ya Espagne ikibura imikino icyenda ngo irangire, Real Madrid iracyayiyoboye n’amanota 66.
Iyi kipe y’umutoza Carlo Ancelotti irarusha Sevilla FC iyikurikiye amanota icyenda, ikarusha kandi FC Barcelone ya gatatu amanota 12.
Iyi kipe y’umutoza Xavi Hernandez cyakora cyo iracyafite umukino w’ikirarane igomba guhuriramo na Rayo Vallcano mu kwezi gutaha.
