Perezida Paul Kagame kuri uyu wa Kabiri yasuye icyanya cya Zambia kibarizwamo inyamaswa z’inkazi i Livingstone, agaragara akinisha igisamagwe.
Kuva ejo ku wa Mbere Perezida Kagame ari i Livingstone mu murwa mukuru w’ubukerarugendo wa Zambia, mu ruzinduko rw’akazi rw’iminsi ibiri ari kugirira muri iki gihugu cyo mu majyepfo ya Afurika.
Umunsi wa mbere mbere w’uruzinduko rw’umukuru w’igihugu muri Zambia wasize agiranye ibiganiro na mugenzi we Hakainde Hichilema uyobora kiriya gihugu, bombi banayobora umuhango w’isinywa ry’amasezerano arindwi y’ubufatanye hagati y’ibihugu byombi.
Kuri uyu wa Kabiri Perezida Hakainde ari kumwe na Madamu we, bakiriye Perezida Kagame mu cyanya gikomye cyo mu mujyi wa Livingstone.
Muri iki cyanya umuntu aba ashobora gutemberana n’Intare cyangwa se Igisamagwe ntibigire icyo bimutwara.
Amafoto yashyizwe kuri Twitter y’Ibiro by’Umukuru w’Igihugu agaragaza Perezida Kagame ari kumwe na mugenzi we Hakainde Hichilema bari ku isumo rya Victoria, akinisha igisamangwe.
Agace Perezida Kagame yasuye, kitwa Victoria Falls and Mukuni Big 5 Safaris. Gakunze gukurura ba mukerarugendo iyo bashaka kureba intare n’inzovu ku buryo bashobora gutemberana na zo.
Perezida Kagame kandi ari kumwe na mugenzi we wa Zambia bateye ibiti ku mupaka wa Kazungula, banatembera ikiraro cya Kazungula kigira uruhare rukomeye mu bwikorezi bikorerwa hagati ya Zambia na Botswana bunyuze mu ruzi rwa Zambezi.
Amafoto: @Urugwiro
