Ikipe ya Gasogi United kuri uyu wa Gatanu yatsinze Kiyovu Sports ibitego 2-0, ihesha APR FC amahirwe yo kongera gufata umwanya wa mbere ku rutonde rwa shampiyona.
Iyi kipe y’umushabitsi Kakooza Nkuliza Charles ‘KNC’, yari yakiriye Kiyovu Sports mu mukino w’agapingane w’umunsi wa 23 wa shampiyona yabereye kuri Stade ya Kigali i Nyamirambo.
Ni umukino amakipe yombi yahuriyemo nyuma y’amagambo aremereye yari yatangajwe n’impande zombi, cyane ku rwa KNC udahwema gushimangira ko “Kiyovu Sports ni we mwanzi ukomeye Gasogi United ifite.”
Gasogi United yatangiye umukino ihusha uburyo bubiri bukomeye, yarangije iminota 45 y’igice cya mbere iri imbere n’igitego 1-0.
Ni igitego cyatsinzwe kuri Penaliti n’umunya-Centrafrique ThĂ©odore Malipangou Christian.
Ni nyuma y’ikosa myugariro Derrick Mutangana yari akoreye kuri rutahizamu Hassan Djibrine mu rubuga rw’amahina.
Uyu rutahizamu w’umunya-Tchad ni we watsindiye Gasogi United igitego cya kabiri cyinjiye ku munota wa 57 w’umukino, ku ishoti riremereye yarekuye yarekuye umupira uruhukira mu izamu rya Kimenyi Yves.
Iminota irenga 30 y’umukino yakurikiyeho yaranzwe n’igitutu gikomeye cya Kiyovu Sports, gusa inanirwa kumenera mu rukuta rw’ubwugarizi bwa Gasogi United yahise ifata umwanya wa munani n’amanota 26 n’umunyezamu Cuzuzo AimĂ© GaĂ«l.
Ni Gasogi United na yo yanyuzagamo igatera icyugazi izamu rya Kiyovu Sports yaburaga myugariro Ngendahimana Eric, biciye kuri Malipangou na Nsengiyumva Mustapha winjiye mu kibuga asimbura.
Igikomeye Kiyovu Sports yakoze ni ikarita itukura yeretswe Kapiteni wayo Kimenyi Yves, nyuma yo kurwana na rutahizamu Malipangou wa Gasogi.
Gutsindwa uyu mukino byatumye Kiyovu Sports igumana umwanya wa mbere n’amanota 50, ikaba ikirusha amanota abiri APR FC iyikurikiye.
Iyi kipe y’Ingabo z’igihugu cyakora cyo ishobora kurarana umwanya wa mbere ku Cyumweru mu gihe yaba itsinze Bugesera FC izakira kuri Stade ya Kigali i Nyamirambo.
