Ikipe ya Police FC yabaye ikipe ya kane izakina ½ cy’irangiza cy’igikombe cy’Amahoro, nyuma yo gusezerera Etoile de l’Est ku giteranyo cy’ibitego 3-1.
Iyi kipe ya Polisi y’igihugu yari yakiriye Etoile de l’Est kuri Stade ya Kigali i Nyamirambo, mu mukino wo kwishyura wa ¼ cy’irangiza.
Ni nyuma y’ubanza wari warabereye i Ngoma Police FC yari yaratsinze ku bitego 2-1.
Igitego cyo ku munota wa 90 w’umukino cya Hakizimana Muhadjili ni cyo cyafashije Police FC gusubira Etoile de l’Est, iyisezerera ku giteranyo cy’ibitego 3-1.
Police igomba guhurira muri ½ cy’irangiza na AS Kigali yo yasezereye Gasogi United ku giteranyo cy’ibitego 2-1, bakazahura mu cyumweru gitaha.
