Ikipe ya Manchester City yo mu Bwongereza na Real Madrid yo muri Espagne, zabimburiye andi makipe akomeye i Burayi zisinyisha abakinnyi bakomeye.
Manchester City ku munsi w’ejo yemeje ko yamaze kugera ku bwumvikane na Borussia Dortmund bwo kugura umunya-Norvège Erling Haaland wakiniraga iriya kipe yo mu Budage.
Uyu rutahizamu w’imyaka 21 y’amavuko Man City igomba kumugura angana na miliyoni 51 z’ama-Pounds, gusa muri rusange ikaba igomba kumutangaho abarirwa muri £ miliyoni 85.5 unabariyemo uduhimbazamusyi.
Haaland wari umaze gutsindira Dortmund ibitego 88 mu mikino 85 yari amaze kuyikinira kuva yayigeramo muri 2020 avuye muri Red Bull Salzburg yo muri Autriche, biteganyijwe ko azerekeza muri Manchester City ku itariki ya 01 Nyakanga; akazasinya amasezerano y’imyaka itanu.
Erling Haaland bivugwa ko azajya ahembwa umushahara ungana n’ibihumbi 385 by’ama-pound ku cyumweru, akazaba anganya na Kevin de Bruyne.
Borussia Dortmund mu rwego rwo kumusimbuza, yahise itangaza ko yasinyishije rutahizamu Karim Adeyemi wakiniraga Salzburg.
Uyu rutahizamu w’imyaka 20 y’amavuko yatanzweho abarirwa muri £ miliyoni 32, asinya amasezerano y’imyaka itanu.
Borussia Dortmund yamusinyishije imupapuye Manchester United yifuzaga kujya imuha umushahara wa £ 150,000 ku cyumweru.
Adeyemi umaze igihe gito ahamagawe mu kipe y’Igihugu y’u Budage, yari amaze gutsindira Salzburg ibitego 23 mu mikino 42 yari amaze kuyikinira mu marushanwa yose.
Real Madrid na yo yagiye ku isoko hakiri kare
Mu gihe Manchester City yatangazaga ko izasinyisha Haaland, Real Madrid yo yasinyishaga myugariro Antonio Rüdiger wakiniraga ikipe ya Chelsea yo mu Bwongereza.
Uyu Mudage yerekeje muri Real Madrid ku buntu, nyuma yo gusoza amasezerano ye muri Chelsea.
Rüdiger wafatwaga nk’umwe muri ba myugariro beza muri shampiyona y’Abongereza, yasinye amasezerano y’imyaka ine muri Real Madrid.
