Igisirikare cya Uganda muri iki cyumweru kizohereza mu kiruhuko cy’izabukuru abasirikare batandukanye, barimo 34 bo ku rwego rwa ba Jenerali.
Mu bo byamenyekanye ko bagomba kujya mu kiruhuko cy’izabukuru barimo Gen Elly Tumwine wahoze ari Minisitiri w’Umutekano na Gen David Sejusa Tinyefuza wahoze ari umuhuzabikorwa w’inzego z’ubutasi.
Lt Gen Andrew Gutti wahoze ari Perezida w’Urukiko rwa Gisirikare, Lt Gen Prossy Nalweyiso usanzwe ari umugore ukomeye kurusha abandi muri UPDF na Lt Gen John Mugume na bo bagomba kujya mu kiruhuko cy’izabukuru.
Abandi barimo uwahoze ari defence attaché muri Ambasade ya Uganda muri Tanzania Maj Gen Stephen Kashaka, Maj Gen Geoffrey Muheesi wabaye Ambasaderi wungirije wa Uganda muri Tanzania, Maj Gen Octavius Butuuro na Maj Gen Burundi Nyamunywanisa basanzwe ari impuguke mu butasi bwa gisirikare cyo kimwe na Maj Gen Elly Kayanja.
Abenshi mu bagiye kujya mu kiruhuko cy’izabukuru biganjemo abafashije Perezida Yoweri Kaguta Museveni mu rugamba rwo kubohora Uganda rwamugejeje ku butegetsi mu 1986.
Muri bo harimo kandi Maj Gen Michael Ondoga wigeze kuyobora Ingabo za Uganda ziri muri Somalia na Maj Gen Stephen Kwiringira wahoze ari Umuyobozi wungirije mu kigo cya Uganda Gishinzwe ibyangombwa (NIRA).
