Gen. Kainerugaba yashyigikiye M23, asaba EAC kugira icyo ikora

Umuhungu wa Perezida Yoweri Museveni akaba n’Umugaba w’ingabo za Uganda zirwanira ku butaka, Lt Gen. Muhoozi Kainerugaba, yagaragaje ko ashyigikiye umutwe witwaje intwaro wa M23 wiganjemo abarwanyi bari barahungiye mu gihugu cyabo.

Ni mu gihe M23 ikomeje imirwano n’ingabo za Leta muri Teritwari ya Rutshuru na Nyiragongo mu ntara ya Kivu y’Amajyaruguru, nyuma yo kunanirwa kumvikana na Leta mu biganiro byaberaga i Nairobi muri Kenya muri Mata 2022.

Ibiro bya Perezida wa RDC byasobanuye ko impamvu y’ihagarikwa ry’ibiganiro hagati ya Leta na M23 ari uko ngo abarwanyi b’uyu mutwe bagabye ibitero ku ngabo zayo mu gihe ibiganiro byari birimbanyije, ariko wo warabihakanye, usobanura ko ahubwo izi ngabo ari zo zabagabyeho ibitero.

M23 ni umutwe ugizwe n’abiganjemo abavuga ururimi rw’Ikinyarwanda (Rwandophone). Bamwe mu Banyekongo babita Abatutsi bakomoka mu Rwanda, mu kwerekana ko atari abo muri iki gihugu, ngo badakwiye kugira uburenganzira bwo kuba muri RDC.

General Sultani Makenga, Komanda wa M23, ni umwe mu barwanyi bari barahungiye muri Uganda

Ariko M23 mu matangazo yasohoye kenshi ibinyujije mu Muvugizi wayo, Major Willy Ngoma, isobanura ko igizwe n’Abanyekongo barwanirira uburenganzira bwabo n’imiryango yabo.

Uyu mutwe washinzwe mu 2012 wigeze kurwana bikomeye n’ingabo za Leta, ariko mu 2013 urambika intwaro, abari bawugize bahungira muri Uganda no mu Rwanda, nyuma gato haba ibiganiro byafatiwemo umwanzuro w’uko abari bawugize bazafashwa gusubira ku mu gihugu cyabo mu mahoro, bamwe basubizwe mu buzima busanzwe, abandi bajye mu ngabo za Leta.

Gusa muri RDC haje kuvugururwa itegeko rirebana n’imitwe yitwaje intwaro, hafatwa umwanzuro w’uko nta barwanyi bazongera kwinjizwa mu ngabo za Leta, birangira amasezerano ya Leta na M23 yabayeho bigizwemo uruhare n’ibihugu byo mu karere atubahirijwe.

Ibi byatumye imirwano yongera kubura, M23 [yari yarasubiye muri Rutshuru gutegererezayo iyubahirizwa ry’amasezerano] n’ingabo za Leta bishinjanya ubushotoranyi.

Nyuma y’aho RDC yinjiriye mu muryango w’akarere ka Afurika y’iburasirazuba, EAC, abakuru b’ibihugu bawugize tariki ya 21 Mata 2022 bateraniye i Nairobi muri Kenya, basaba ubuyobozi bw’iki gihugu kugirana ibiganiro n’imitwe yitwaje intwaro.

M23 yitabiriye ibiganiro, ariko nyuma y’umunsi umwe bitangiye, Leta ya RDC itangaza ko iyirukanye muri ibi biganiro, kubera impamvu yavuzwe haruguru. Imirwano yarakomeje, ndetse muri iyi minsi yafashe indi ntera mu gace ka Kibumba na Jomba.

Gen. Kainerugaba mu butumwa amaze gutangariza kuri Twitter, yabanje kunenga abakwirakwiza imvugo z’urwango, bitwaza ko abarwanyi ba M23 ari Abatutsi cyangwa Abahima, anavuga ko uyu mutwe umaze imyaka myinshi ushaka ibiganiro by’amahoro.

Yagize ati: “Ntabwo ari icyaha kuba Umututsi, Umuhima, Umuhema cyangwa Umunyamulenge! M23 imaze imyaka myinshi ishaka ibiganiro by’amahoro. Umuryango wa Afurika y’iburasirazuba ukwiye gutanga ubufasha mu gukemura iki kibazo.”

Gen. Kainerugaba kandi yasobanuye ko ari umwe mu bagizweho ingaruka n’ivangura, bityo azi ububi bwaryo. Ati: “Kuva nkiri umwana navanguwe hashingiwe ku bwoko bwanjye, uko ngaragara, ururimi n’ibindi. Iteka nzahora ntemeranya n’abantu batekereza batyo. Abatutsi/Abahima mu burasirazuba bwa RDC ntibakwiye guhohoterwa. Ingaruka zaba mbi cyane.”

N’ubwo M23 ivuga ko ari umutwe w’Abanyekongo barwanirira uburenganzira bwabo n’imiryango yabo ku butaka bwa RDC, Leta yo iyifata nk’umutwe w’iterabwoba.