Lionel Messi yaraye atsindiye ikipe y’igihugu ya Argentine ibitego bitanu, mu mukino wa gicuti wabereye muri Espagne yanyagiyemo Estonie ibitego 5-0.
Ni Messi waherukaga gufasha Argentine kwegukana igikombe cya Finalissima, nyuma yo kunyagira u Butaliyani ibitego 3-0 mu mukino yatanzemo imipira ibiri yavuyemo ibitego.
Bakina na Estonie, Messi yafunguye amazamu kuri Penaliti yo ku munota wa munani w’umukino, mbere yo gutsinda icya kabiri ku munota wa 45 cyatumye amakipe yombi ajya kuruhuka Argentine iri imbere n’ibitego 2-0.
Messi yatsinze igitego cya gatatu ku munota wa 47, ku wa 71 atsinda icya kane mbere yo gutsinda agashinguracumu nyuma y’iminota itanu.
Ni ku nshuro ya mbere Messi yatsindiraga Argentine ibitego bitanu mu mukino umwe, gusa ikaba inshuro ya kabiri abikoze muri Kariyeri ye.
Iki gihangange cyaherukaga gutsinda ibitego bitanu mu mukino umwe ubwo FC Barcelona yakiniraga icyo gihe yanyagiraga Bayer Leverkusen ibitego 7-1, mu mukino wa UEFA Champions league.
Igitego cya kane Messi yatsinze Estonie cyatumye aca k’umunya-Hongrie, Ferenc Puskas wari ku mwanya wa kane mu bakinnyi batsindiye ibihugu byabo ibitego byinshi.
Messi kuri ubu umaze gutsindira Argentine ibitego 87, ararushwa ibitego bibiri na Mokhtar Dahari wahoze akinira Malaysie, akarushwa 22 na Ali Daei wahoze akinira Iran ndetse aranarushwa ibitego 30 na Cristiano Ronaldo.
Messi yakabaye yegereye Cristiano, gusa uyu munya-Portugal yaraye atsinze ibitego bibiri muri bine we na bagenzi be batsinze u Busuwisi muri UEFA Nations league.
