CAF Champions league: APR FC yatomboye nabi

Ikipe ya APR FC yatomboye US Monastir yo muri Tunisia, mu ijonjora ry’ibanze rya CAF Champions League 2022/23.

Hari muri tombora yabereye mu kanya kashize i Cairo mu gihugu cya Misiri.

Monastir iyi kipe y’Ingabo z’Igihugu yatomboye ni imwe mu makipe akomeye cyane mu gihugu cya Tunisia, mu mwaka ushize w’imikino ikaba yari yabaye iya kabiri muri shampiyona.

Ni ikipe byitezwe ko ishobora guha akazi gakomeye APR FC, dore ko iyi kipe y’Ingabo z’Igihugu itanakunze kurusyaho imbere y’amakipe yo muri Tunisia.

Urugero rwiza ni mu mwaka w’imikino ushize aho yasezerewe mu ijonjora rya kabiri rya CAF Champions league na Etoile Sportive du Sahel ku giteranyo cy’ibitego 4-1.

APR FC yabonye itike yo guhagararira u Rwanda mu mikino ya CAF Champions Leagu nyuma yo kwegukana igikombe cya shampiyona ya 2021/22 igikombe yegukanye ubugira gatatu yikurikiranya kuva yatangira gutozwa n’umutoza Adil Erradi Mohammed.

Mu gihe iyi kipe y’Ingabo z’Igihugu yaba isezereye ikipe ya US Monastir mu ijonjora ry’ibanze, yazahura na Al Ahly yo muri Misiri, mu ijonjora rya kabiri.

Imikino ibanza mu ijonjora ry’ibanze rya CAF Champions league iteganyijwe hagati y’itariki ya 09 na 11 Nzeri, mu gihe iyo kwishyura iteganyijwe hagati y’itariki ya 16 n’iya 18 Nzeri.

Imikino ibanza y’ijonjora rya kabiri ry’iri rushanwa yo iteganyijwe hagati y’itariki ya 07 n’iya 09 Ukwakira, mu gihe iyo kwishyura iteganyijwe hagati y’itariki ya 14 n’iya 16 Ukwakira.