Imirwano yongeye kubura hagati y’Ingabo za Leta ya Ethiopia n’inyeshyamba z’ishyaka TPLF riyoboye intara ya Tigray, nk’uko amakuru aturuka muri kiriya gihugu abivuga.
Ni nyuma y’amezi menshi impande zombi zarahagaritse imirwano.
Imirwano hagati y’impande zombi kuva kuri uyu wa Gatatu iri kubera hafi y’Umujyi wa Kobo, nk’uko umuhinzi utuye muri kariya gace yabihamirije Ibiro Ntaramakuru by’Abongereza (Reuters).
Yagize ati: “Ndi kumva urusaku rw’imbunda ziremereye kuva muri iki gitondo. Mu cyumweru gishize nabonye Ingabo zidasanzwe zo muri Amhara n’iza Fano zerekeza ku rugamba na Bisi.”
Umuturage wa kabiri wavuganye na Reuters yayibwiye ko na we yumvise urusaku rw’imbunda ziremereye, ashimangira ko mu minsi ibiri ishize habayeho urujya n’uruza rw’abarwanyi b’aba-Fano ndetse n’urw’Ingabo zidasanzwe zo muri Amhara.
Kugeza ubu yaba Legesse Tulu usanzwe ari Umuvugizi wa Guverinoma ya Ethiopia, Colonel Getnet Adane usanzwe ari Umuvugizi w’Ingabo na Billene Seyoum uvugira Minisitiri w’Intebe, Dr Abiy Ahmed ntacyo baratangaza kuri iriya mirwano.
Hagati aho Televiziyo ya Tigrai igenzurwa na Leta ya Tigray, yatangaje ko “Ingabo za Ethiopia zifatanyije n’Ingabo zidasanzwe za Amhara ndetse n’abarwanyi bo muri Amhara batangiye ibitero bikomeye kuva mu ma saa kumi n’imwe z’igitondo.”
Ingabo za Ethiopia n’inyeshyamba za TPLF bubuye imirwano nyuma y’uko muri Werurwe uyu mwaka bari bahagaritse imirwano mu rwego rwo gutangira ibiganiro by’amahoro hagati ya Guverinoma ya Abiy Ahmed na TPLF.
Ni imirwano yasize ababarirwa muri za muri za miliyoni bavuye mu byabo, abatari bake baricwa ndetse Tigray n’ibindi bice bya Ethiopia byugarizwa n’inzara.
