Perezida Tshisekedi yahaye imirimo Jenerali wapfuye mu myaka 11 ishize

Perezida wa Repubulika Iharanira Demokarasi ya Congo akanaba Umugaba w’Ikirenga w’Ingabo z’iki gihugu, yahaye imirimo mishya Général-Major Floribert Kisembo Bahemuka umaze imyaka 11 yarapfuye.

Itangazo ryasomewe kuri Radiyo na Televiziyo y’Igihugu ya Congo Kinshasa (RTNC), rivuga ko Gen Bahemuka yagizwe na Tshisekedi ukuriye ibikorwa bya gisirikare mu ntara ya Equateur.

Ni mu gihe uyu musirikare wahoze akuriye ibikorwa by’Ingabo za Congo Kinshasa mu gace ka Lubutu ho mu ntara ya Maniema yishwe mu ijoro ryo ku wa 30 Mata 2011.

Général-Major Floribert Kisembo Bahemuka yiciwe n’Ingabo za Congo Kinshasa ahitwa Lonyo ho muri Teritwari ya Djugu, mu ntara ya Ituri. Byari nyuma y’ibyumweru bibiri atorotse Igisirikare cya Congo Kinshasa akajya gushinga umutwe witwaje intwaro, bijyanye no kuba yari asanzwe afitanye amakimbirane na Perezida Joseph Kabila.

Urupfu rwe icyo gihe rwemejwe na Colonel Fal Sikabwe wari ukuriye ibikorwa bya FARDC muri Ituri wavuze ko yapfuye nyuma yo gukomerekera mu mirwano yasakiranyije Ingabo zo muri Brigade ya kane muri FARDC n’inyeshyamba yari ayoboye.