M23 yigaruriye utundi duce 2 dukomeye twahoze ari indiri ya FDLR

Umutwe wa M23 wigaruriye uduce twa Kisenguro na Katwiguru two muri Groupement ya Bweza ho muri Teritwari ya Rutshuru; uduce twari tumaze igihe dufatwa nk’amatware y’inyeshyamba zo mu mutwe wa FDLR.

M23 yatwigaruriye, nyuma y’imirwano ikomeye yasakiranyije abarwanyi bayo n’abo muri uriya mutwe wundi urwanya ubutegetsi bw’u Rwanda.

Ni imirwano amakuru avuga ko yagejeje ku mugoroba w’ejo ku Cyumweru.

FDLR hashize igihe bivugwa ko ifatanya n’Ingabo za Congo Kinshasa, mu mirwano zihanganyemo na M23 kuva mu mpera z’umwaka ushize wa 2021.

M23 yayambuye turiya duce twombi nyuma y’igihe gito nanone yirukanye abarwanyi bayo mu gace ka Tongo, nyuma y’imyaka 18 gafatwa nk’indiri y’abarwanyi ba FDLR.

Imirwano ku Cyumweru amakuru avuga ko yanabereye muri Teritwari ya Nyiragongo by’umwihariko mu gace ka Kibumba, bikavugwa ko FARDC yaba yisubije ibirindiro bitatu byagenzurwaga na M23, birimo iby’ahazwi nko ku minara itatu biri mu bilometero 20 uvuye i Goma.

Kuri uyu wa Mbere amakuru aturuka muri RDC bwo avuga ko imirwano ikomeye yaramukiye mu midugudu ya Busenene, Kangano, Kisangani na Kabizo; ndetse M23 bivugwa ko yamaze kwigarurira undi witwa Rusekera wo muri Teritwari ya Rutshuru.