Colonel Nzenze abona nta ‘byacitse’ kuba M23 yakwambara impuzankano ya RDF

Colonel Nzenze Imani uyobora abarwanyi ba M23 bari barafashe gurupoma ya Kibumba yatangaje ko nta ‘byacitse’ kuba we na bagenzi be bakwambara impuzankano zirimo iz’igisirikare cy’u Rwanda kizwi nka RDF.

Uyu musirikare yabivuze ashingiye kuri raporo zitandukanye zirimo izasohowe n’urwego rw’ubutasi rwa Repubulika ya Demukarasi ya Congo (RDC) ndetse n’impuguke z’Umuryango w’Abibumbye, ubwo yari mu kiganiro n’abanyamakuru tariki ya 23 Ukuboza, muri Kibumba.

Col. Nzenze yatangaje ko kuba bamwe mu barwanyi ba M23 bakwambara impuzankano y’igisirikare cy’u Rwanda nta kidasanzwe kirimo kuko inyeshyamba zambara izo zibonye zose, asobanura ko bafite izo mu bihugu bitandukanye.

Atunga urutoki ku karindamasasu yambaye, yabajije ati: “Iyi si impuzankano y’u Rwanda?” Akomeza yerekana izindi mpuzankano abarwanyi ba M23 bambaye, ati: “Iyi ni iya Amerika, iriya ni iya special force ya FARDC, iyi ni iya komando, iyi ni iya Uganda, iyi ni iya FARDC. Abarwanyi bambara impuzankano zose. Iza Uganda turambara, iza Kenya; n’iza Kenya zirahari, turazambara.”

Yerekanye ingofero, asobanura ko ari iy’ingabo za Kenya, maze akomeza ati: “Twebwe twambara impuzankano zose. Aaah! Reba inyuma yawe, iriya ni iya hehe? Iriya ni iy’u Budage, si iy’u Budage? Twebwe twambara impuzankano zose.”

Igisirikare cya RDC gifata impuzankano M23 yambara nka kimwe mu bimenyetso simusiga by’uko ingabo z’u Rwanda zaba zifasha uyu mutwe witwaje intwaro. Gusa ntacyo kivuga ku zo mu bindi bihugu abarwanyi bawo bagaragara bambaye.