Ikipe y’Igihugu ya Algeria yatsinze iya Libya igitego 1-0, mu mukino ufungura Igikombe cya Afurika cy’abakina imbere mu bihugu byabo (CHAN 2023) wabaye kuri uyu wa Gatanu.
Ni umukino wabereye kuri Stade yitiriwe Nelson Mandela iherereye i Algiers muri Algeria yakiriye ririya rushanwa.
Umunyarwanda Uwikunda Samuel ari mu basifuzi bawuyoboye, dore ko yari uwa kane.
Igitego rukumbi cyo ku munota wa 57 w’umukino cyatsinzwe kuri penaliti na Aymen Mahious ni cyo cyatandukanyije impande zombi, nyuma yo gukorerwaho ikosa mu rubuga rw’amahina n’umunyezamu Muad Allafi wa Libya.
Usibye iki gitego nta bitangaza bindi bikomeye byagaragaye muri uyu mukino, bijyanye n’uko amakipe yombi ya biriya bihugu bisanzwe binaturanye yasaga n’aho ari ku rwego rumwe.
Kuri uyu wa Gatandatu CHAN irakomeza hakinwa imikino itatj, irimo uwo mu tsinda A Ethiopia yasezereye Amavubi mu ijonjora rya nyuma ryo gushaka itike ihuriramo na Mozambique.
Mu tsinda B Repubulika Iharanira Demokarasi ya Congo ifite ibikombe bibiri bya CHAN irakina n’Imisambi ya Uganda, mu gihe Côte d’Ivoire ikina na Sénégal mu mikino yombi ibera mu mujyi wa Annaba.
