Premier league: Manchester United yisasiye Manchester City, iha agahenge Arsenal

Ikipe ya Manchester United yatsinze Manchester City ibitego 2-1, bituma Arsenal zisa n’izihanganiye Igikombe cya shampiyona ibona agahenge.

Amakipe yombi yari yahuriye mu mukino wa derby yo mu mujyi wa Manchester wa 20 wa shampiyona y’Abongereza wabereye ku kibuga cya Stade ya Old Trafford.

Ni umukino watangiye amakipe yombi atinyana ndetse umupira ukinirwa mu kibuga hagati gusa, n’ubwo Manchester City nk’ibisanzwe yarushaga mukeba wayo mu bijyanye no kwiharira umupira.

Mu gice cya mbere cy’umukino Manchester United yagerageje uburyo bubiri bukomeye imbere y’izamu, gusa Marcus Rashford ananirwa igikorwa cya nyuma.

Igice cya mbere cyarangiye amakipe yombi anganya 0-0.

Igice cya kabiri cyatangiranye impinduka ku ruhande rwa Manchester United zasize Umufaransa Anthony Martial ahaye umwanya umunya-Brésil Anthony Santos.

Ku munota wa 56 w’umukino umutoza Pep Guardiola na we yakoze impinduka ku ruhande rwa Man City, avana mu kibuga Phil Foden wahise aha umwanya Jack Grealish.

Byasabye iminota ine yonyine ngo uyu Mwongereza ahite afungurira Manchester City amazamu, ku mupira yari ahinduriwe na Kevin De Bruyne bikarangira awuteretse mu izamu rya Devid De Gea n’umutwe.

Manchester City yakomeje kwiharira umupira gusa uburyo buke bw’ibitego yagiye irema ntibwagira icyo butanga.

Ku munota wa 72 w’umukino umutoza Erik Ten Hag yakoze izindi mpinduka zasize avanye mu kibuga umunya-Denmark Christian Eriksen amusimbuza Umunya-Argentine Alejandro Garnacho.

Kera kabaye ku munota wa 78 w’umukino Casemiro yanyujije umupira mwiza mu bakinnyi ba Man City, maze Rashford wari waraririye awurekera Bruno Fernandes wahise awutereka mu izamu rya Eserson Moraes.

Manchester United yari imaze kuzamura icyizere yongeye kuzamukana umupira nyuma y’akazi gakomeye ka Casemiro na Garnacho, Rashford ayitsindire igitego cya kabiri cyo ku munota wa 82 w’umukino.

Ni igitego cya cyenda cyikirikiranya uyu musore ukiri muto yari atsindiye i Old Trafford.

Iminota ya nyuma y’umukino yaranzwe n’igitutu cyinshi Man City yashyize kuri Man United gusa nticyagira icyo gitanga.

Gutsinda uyu mukino byatumye Manchester United ya gatatu ku rutonde rwa shampiyona n’amanota 38 yegera cyane Manchester City iyiri imbere, dore ko iyirusha inota rimwe ryonyine.

Gutsindwa uyu mukino kwa Manchester City kandi byahaye agahenge Arsenal ya mbere, dore ko iyi kipe y’umutoza Mikel Arteta ikiyirusha amanota atanu mbere yo gusura mukeba wayo Tottenham kuri iki cyumweru.