Rutahizamu w’Ikipe y’Igihugu ‘Amavubi’, Gérard Bi Goua Gohou, yamaze yatandukana n’ikipe ya Aktobe FC yo mu cyiciro cya mbere muri Kazakhstan; nyuma y’umwaka umwe ayikinira.
Gérard Gohou wari usoje amasezerano ye, yari amaze gukinira FC Aktobe imikino 24; ayitsindira ibitego umunani ndetse n’imipira itatu yavuyemo ibitego bitatu yatanze.
Hari andi makuru cyakora cyo avuga ko uyu rutahizamu w’imyaka 34 y’amavuko banze kumwongerera amasezerano, nyuma yo kugongwa n’itegeko ritemerera amakipe yo muri Kazakhstan gukinisha abanyamahanga barengeje iriya myaka.
Gérard Bi Goua Gohou ukomoka i Abidjan muri Côte d’Ivoire, mu mwaka ushize wa 2022 ni bwo yatangiye gukinira Amavubi y’u Rwanda.
Mu mikino ine amaze gukinira iyi kipe, yayitsindiye igitego kimwe yinjije ubwo Amavubi yatsindaga Sudani igitego 1-0 mu mukino wa gicuti wabereye i Kigali.
