Ahagana saa tanu z’igitondo cyo kuri uyu wa 23 Mutarama 2023, ni bwo inkongi y’umuriro yibasiye amacumbi y’abanyeshuri bo muri IPRC-Kigali ari mu karere ka Kicukiro, umurenge wa Kicukiro mu kagari ka Kicukiro hahiramo ibikoresho bitandukanye birimo ibitanda, matera n’ibikoresho by’abanyeshuri.
Iyi nyubako yahiye ubwo abanyeshuri bari mu ishuri bagiye kwiga maze bakabona mu macumbi yabo hari gupfupfunuka umwotsi, bahita basohoka bagiye kureba icyabaye. Bakigerayo, bamwe na bamwe bahise batangira kurokora bimwe mu bikoresho.
Biri gukekwa ko icyaba cyateye iyi nkongi ari amasinga y’amashanyarazi yashaje ku buryo bishoboka ko yaba yakoranyeho cyane cyane ko n’iyi nyubako ishaje.
Agaciro k’ibyangirikiye muri iyi nyubako ntikaramenyekana.
