Pasiteri Niyonzima Claude agiye gucuruza akabari n’amacumbi y’indaya

Umuvugabutumwa Rev. Past. Niyonzima Claude uhamya ko ari umuhanuzi w’Imana yari yatangaje ko urukiko rukatira igifungo gisubitse Bamporiki Edouard wabaye Umunyamabanga wa Leta muri Minisiteri y’urubyiruko n’umuco igifungo gisubitse, ntajye muri gereza.

Uyu muvugabutumwa uri mu bamaze kwandika izina ku miyoboro ya YouTube ni umwe mu bari bagiye ku rukiko rukuru i Nyamirambo kuri uyu wa 23 Mutarama 2023, kumva umwanzuro warwo ku rubanza rwa Bamporiki umaze amezi 8 akurikiranwa n’ubutabera.

Mbere y’uko urubanza rusomwa, Pasiteri Claude yabwiye umunyamakuru wa 3D TV ko aherutse gusengera ku musozi wa Kanyarira mu minsi ishize, mu bo yasengeye harimo Bamporiki, amusabira kudafungwa.

Yabwiye uyu munyamakuru ko Imana yafashe umutima w’umucamanza w’urukiko rukuru, imutegeka gukatira Bamporiki igifungo gisubitse kigeretseho ihazabu atavuze ingano yayo. Yeruye ko uyu munyapolitiki atari bujye muri gereza.

Pasiteri Claude yarahiye mu izina ry’Imana ko Bamporiki nakatirwa igifungo cyo kujya muri gereza, arahita yiyambura izina ry’umuhanuzi w’Imana, ahagarike n’ivugabutumwa, ajye gucuruza akabari n’amacumbi yakira indaya.

Yagize ati: “Icyo niteguye uyu munsi ntabwo ari icyo mbwirwa n’umuntu. Imana ivuga rimwe cyangwa se kabiri, ni uko urukiko rugiye gutegeka ko Bamporiki atajya Mageragere, asubikiwe igihano, agatangwa n’ihazabu y’urukiko.”

Pasiteri Claude yakomeje ati: “Njyewe mvuga icyo Imana yambwiye. Ni uko Bamporiki araba yemerewe kujya Nyabugogo, araba yemerewe kujya mu ntara, araba yemerewe kujya aho ari ho hose. Nk’umuhanuzi w’Imana, umucamanza nadategeka mu kanya ko Bamporiki arekuwe, asubikiwe igihano, nemeye nka Pasitoro, ndahita niyambura umwambaro w’ubupasitoro, njye gucuruza akabari n’amacumbi y’indaya.”

Uyu muvugabutumwa yasobanuye ko ubuhanuzi bwe nibudakora, ataraba akiri intumwa y’Imana, ahubwo ngo araba ari iya Satani. Yemeje kandi ko ibi yabitangarije no ku yindi miyoboro ya YouTube irimo The Choice Live.

Gusa bitandukanye n’ibyo Pasiteri Claude yari yahanuye, urukiko rukuru rwakatiye Bamporiki igifungo cy’imyaka 5 [kidasubitse], rumuca n’ihazabu y’amafaranga y’u Rwanda miliyoni 30.

Umuvugizi w’urwego rw’igihugu rw’ubugenzacyaha, Dr Murangira Thierry, yaraye abwiye itangazamakuru ko Bamporiki yashyikirijwe urwego rw’igihugu rushinzwe igorora (RCS), rumujyana kumufungira muri gereza ya Nyarugenge izwi nka Mageragere.

Bamporiki yari afungiwe mu rugo rwe kuva tariki ya 6 Gicurasi 2022 ubwo yatangiraga gukurikiranwaho icyaha cyo kwakira indonke. Kuri ubu yahamijwe icyo kwihesha ikintu cy’undi hakoreshejwe uburiganya no gukoresha ububasha ahabwa n’amategeko mu nyungu ze bwite.