Umushumba wa Kiliziya Gatolika ku Isi, Papa Francis, yasabye abatuye Isi guherekezanya isengesho urugendo agomba kugirira muri Repubulika Iharanira Demokarasi ya Congo na Sudani y’Epfo.
Kuri uyu wa Kabiri tariki ya 31 Mutarama ni bwo Papa Francis azatangira uruzinduko rw’iminsi ine muri Congo Kinshasa, aho azava yerekeza muri Sudani y’Epfo.
Mu butumwa yanyujije kuri Twitter ye, yasabye abatuye Isi guherekezanya isengesho uru rugendo rwe azagirira hano ku mugabane wa Afurika.
Ati: “Ejo nzajya mu rugendo rw’ubutumwa muri Repubulika Iharanira Demokarasi ya Congo no muri Repubulika ya Sudani y’Epfo. Ndamukanyije urukundo abo baturage bantegereje. Ndasaba buri wese nyamuneka guherekezanya uru rugendo isengesho.”
Biteganyijwe ko ku munsi wa mbere w’uruzinduko rwe, Papa Francis azabanza kuganira n’abayobozi batandukanye muri Congo Kinshasa.
Bukeye bwaho azasomera misa ku kibuga cy’indege cya Ndolo, na ho ku gicamunsi ahure n’abagizweho ingaruka n’ubugizi bwa nabi bwakuruwe n’umutekano muke mu Burasirazuba bw’igihugu.
Ku wa 2 Gashyantare Papa Francis azahura n’urubyiruko muri Stade des Martyrs i Kinshasa, na ho ku gicamunsi avuge isengesho n’abihayimana muri cathédrale Notre-Dame-du-Congo.
Biteganyijwe ko Papa azava muri RDC tariki 3 Gashyantare aho azabanza kuganira n’abashumba ba za diyosezi, akazahava akomereza i Juba muri Sudani y’Epfo, aho azahurira n’Umuyobozi Mukuru w’Abangilikani ku Isi, Justin Welby.
