Igisirikare cy’u Rwanda (RDF) kuri uyu wa Mbere tariki ya 06 Gashyantare, cyifatanyije na UPDF cya Uganda mu kwizihiza ibirori by’umunsi mukuru wa ‘Tarehe Sita’ Uganda yizihizaga ku nshuro ya 42.
Ni ibirori ku ruhande rwa RDF byitabiriwe n’Umugaba w’Ingabo z’u Rwanda zirwanira ku butaka, Lt. Gen Mubarakh Muganga wari kumwe n’Umuvugizi w’Ingabo z’u Rwanda, Brig Gen Ronald Rwivanga.
Abandi bitabiriye biriya birori byabereye i Mbarara barimo Col. RĂ©gis Gatarayiha usanzwe ari Umuyobozi wungirije ushinzwe ubutasi bwa gisirikare muri RDF, cyo kimwe na Ambasaderi w’u Rwanda i Kampala, Col. Joseph Rutabana.
Tarehe Sita ifatwa nk’umunsi mukuru w’Ingabo za Uganda, iba buri mwaka ku itariki ya 06 Gashyantare, hakizihizwa umunsi Perezida Yoweri Museveni yatangirijeho urugamba rwo kubohora Uganda rwashyize iherezo ku butegetsi bw’umunyagitugu Milton Obote.
Amateka yerekana ko ku wa 06 Gashyantare mu 1981 ari bwo Perezida Museveni yayoboye igitero inyeshyamba za NRA yari ayoboye zagabye ku kigo cya gisirikare cya Kabamba kikaba imbarutso y’urugamba rwo kubohora Uganda.
Icyo gihe hari bamwe mu Banyarwanda bagize uruhare muri icyo gitero.
Abo barangajwe imbere na Nyakwigendera Maj Gen Fred Gisa Rwigema na Perezida wa Repubulika, Paul Kagame.
Museveni usanzwe ari Umugaba w’Ikirenga w’Ingabo za Uganda ni we wari umushyitsi mukuru mu birori bya Tarehe Sita byabereye i Mbarara kuri uyu wa Mbere, ndetse yabyambikiwemo umudari uruta indi mu gisirikare cya Uganda.
