Igisirikare cya Repubulika Iharanira Demokarasi ya Congo (FARDC), cyahamagariye amahanga ndetse n’Umuryango wa Afurika y’Iburasirazuba kuzirikana ko ‘M23 yishe amasezerano ayisaba guhagarika imirwano’, gisaba kuyifatira ibyemezo.
Byatangajwe n’Umuvugizi wa Guverineri wa Gisirikare w’Intara ya Kivu y’Amajyaruguru, Lt Col Njike Kaiko, mu itangazo yasomeye imbere y’abanyamakuru kuri uyu wa Gatanu i Goma.
Uyu musirikare yarondoye ibitero bitandukanye FARDC ishinja M23 kuyigabaho, ndetse n’andi makosa uriya mutwe ngo waba warakoze anyuranyije n’imyanzuro y’inama ya Luanda yo ku wa 23 Ugushyingo 2023.
Lt Col Njike yagize ati: “Kurenga [ku myanzuro y’inama ya Luanda] guheruka kubaho byabaye bukeye i Bujumbura habereye inama idasanzwe y’abakuru b’ibihugu, aho inyeshyamba za M23 zagabye igitero ku birindiro bya FARDC ku wa 05 Gashyantare, i Tuwonane hafi ya Karenga no muri Rumeti ku misozi yitegeye imijyi ya Gahucha na Mushaki.”
Uyu musirikare yanashinje M23 kugira uruhare ku gitero cyagabwe kuri kajugujugu ya MONUSCO yarasiwe mu gace ka Kibati ku itariki ya 06 Gashyantare, mu gihe uriya mutwe waherukaga gutangaza ko iriya ndege yarashwe na FARDC.
Igisirikare cya Congo kivuga ko igitero kuri iriya ndege ari ikimenyetso cy’uko M23 yanze guhagarika imirwano nyamara yari yarabisabwe n’imyanzuro ya Luanda na Nairobi.
Cyavuze ko gihamagarira “Umuryango mpuzamahanga na EAC kuzirikana ko M23 yanze guhagarika imirwano” kugira ngo bayifatire ibyemezo.
