U Rwanda ruri mu bihugu 141 byatoye umwanzuro usaba ko ingabo z’u Burusiya zihagarika intambara zimaze umwaka zitangije muri Ukraine, zikava muri iki gihugu.
Kuri uyu wa 23 Gashyantare 2023, ku cyicaro cy’Umuryango w’Abibumbye ni bwo habereye iri tora ry’Inteko Rusange rishyigikira ubusugire bwa Ukraine.
U Rwanda, ibihugu byo mu muryango w’akarere ka Afurika y’iburasirazuba bitatu: Kenya, Repubulika ya demukarasi ya Congo na Sudani y’Epfo byawutoye, Uganda n’u Burundi byifashe, mu gihe Tanzania yo ititabiriye itora.
U Burusiya n’ibindi bihugu 6 birimo Koreya ya Ruguru, Mali, Beralus, Eritrea, Syria na Nicaragua byanze uyu mwanzuro. Ibyifashe byo ni 32, bikaba byiganje ku mugabane wa Afurika.
Umuryango w’Abibumbye uvuga kuri iri tora, wagize uti: “Inteko Rusange yasabye ko intambara yo muri Ukraine ihagarara, isaba u Burusiya kuva byihuse muri iki gihugu, bijyanye n’amasezerano ya UN. Iyi nteko rusange idasanzwe ya UN ije nyuma y’umwaka u Burusiya butangije ibitero bigari muri Ukraine.”
Ibyavuye muri iri tora ryashimishije abayobozi batandukanye ku Isi batajya imbizi na Leta y’u Burusiya barimo Perezida wa komisiyo y’umuryango w’ubumwe bw’u Burayi, Ursura von der Leyen.
Ursula yagize ati: “Ibihugu 141 byasabye ko ubwigenge n’ubusugire bwa Ukraine bugaruka. Umwaka uruzuye, umuryango mpuzamahanga ushyigikiye cyane Ukraine. Ubusabe burasobanutse: U Burusiya bugomba guhagarika intambara yabwo y’u Bushotoranyi.”
U Burusiya bwatangije intambara muri Ukraine tariki ya 24 Gashyantare 2023, bitegetswe na Perezida wabwo, Vladimir Putin.
One Response
U Rwanda mu bihugu bishyigikiye ko ingabo z’u Burusiya ziva muri Ukraine byihuse
UN Niki ? UN ninde ?
UN ni America.
UN Ni America nabayirinyuma
Ese uburusiya bubangamiye nde?
Ese America muri LIBYE,IRAQ, AFGHANISTAN,… Ninde wayijyanyeyo ninde wayikuyeho ?