Igihugu cy’u Burusiya n’icya Ukraine byatangaje ko hari abasirikare barenga 200 b’impande zombi batashye mu bihugu byabo, nyuma yo kubahererekanya nk’imfungwa z’intambara.
Minisiteri y’Ingabo z’u Burusiya ku wa Mbere yatangaje ko hari abasirikare 106 b’iki gihugu barekuwe na Ukraine, nyuma y’uko ibihugu byombi bibyumvikanyeho.
Ukraine biciye muri Andriy Yermak usanzwe ari Umugaba w’Ingabo zayo zirwanira ku butaka na yo yatangaje ko hari abasirikare bayo 100 barekuwe n’u Burusiya.
Impande zombi cyakora ntizigeze zitangaza niba amasezerano yo kurekura bariya basirikare zemeranyije hari umuhuza mu biganiro waba warayagizemo uruhare.
Yermak yavuze ko mu basirikare ba Ukraine barekuwe bamwe muri bo bari bafite ibikomere binini mu gihe abandi bari barwaye.
Urwego rushinzwe kuvura imfungwa z’intambara muri Ukraine rwavuze ko hafi ya ½ cy’abasirikare 80 b’abagabo na 20 b’igitsina gore u Burusiya bwarekuye “bari bafite ibikomere bikomeye, uburwayi cyangwa barakorewe iyicarubozo.”
Yermak yavuze ko gahunda ya Ukraine n’u Burusiya yo guhererekanya imfungwa yatangiye mu mwaka ushize wa 2022 “nta bwo yari yoroshye.”
U Burusiya ku ruhande rwabwo bwavuze ko abasirikare barekuwe na Ukraine bahise bajyanwa i Moscou n’indege mu rwego rwo kubavura.
Guhererekanya imfungwa z’intambara biri mu nzego nke cyane Ukraine n’u Burusiya bisanzwe bifitanyemo ubufatanye, dore ko kuva muri Gashyantare umwaka ushize ibihugu byombi bimaze guhererekanya abasirikare bagiye bafatirwa ku rugamba ndetse n’imirambo y’abaruguyeho.
