Perezida wa Repubulika, Paul Kagame, yamaze kugera i Dar es Salaam muri Tanzania; mu ruzinduko rw’akazi ari kugirira muri iki gihugu.
Ni uruzinduko rw’iminsi ibiri Umukuru w’Igihugu yatumiwemo na mugenzi we Samia Suluhu Hassan wa Tanzania.
Perezida Paul Kagame akigera ku kibuga cy’indege cyitiriwe Mwalimu Julius Nyerere yakiriwe n’itsinda ry’abayobozi bo muri Guverinoma ya Tanzania bari bayobowe na Minisitiri w’Ububanyi n’Amahanga, Dr Stergomena Tax.
Byitezwe ko ku gicamunsi cyo kuri uyu wa Kane yakirwa na mugenzi we wa Tanzania bakaganira; mbere yo kugirana ikiganiro n’itangazamakuru.
U Rwanda na Tanzania bisanzwe bibanye neza, ndetse Guverinoma y’iki gihugu yatangaje ko yishimira umubano ushingiye kuri dipolomasi ifitanye n’u Rwanda ndetse n’ubufatanye ibihugu byombi bifitanye mu nzego zirimo ubucuruzi n’ishoramari, ingufu, ubucukuzi, uburezi ndetse n’umuco.
Ibihugu byombi by’umwihariko bifitanye imishinga itandukanye irimo umushinga w’urugomero rw’amashanyarazi rwa Rusumo ndetse n’uwo kubaka inzira ya gariyamoshi ihuza Isaka na Kigali.
Uruzinduko rwa Perezida Kagame muri Tanzania ruje rukurikira urw’iminsi ibiri Perezida w’iki gihugu, Samia Suluhu, yagiriye mu Rwanda muri Kanama 2021.
Ni uruzinduko rwasize u Rwanda na Tanzania basinyanye amasezerano atanu arimo ay’ubufatanye mu ikoranabuhanga n’itumanaho. Byasinyanye kandi ay’ubufatanye mu bijyanye n’urujya n’uruza rw’abantu n’ibintu, uburezi n’amabwiriza agenga ibijyanye n’imiti.
Nyuma yo gushyira umukono kuri aya masezerano, Perezida Kagame yavuze ko u Rwanda na Tanzania ari ibihugu by’inshuti bisangiye ibirenze umupaka.
Ati: “U Rwanda na Tanzania bisangiye ibirenze umupaka, igihango gikomeye dufitanye mu bijyanye n’amateka n’ubushake duhuriyeho bwo gutanga ibyiza ku baturage bacu bwagiye buba izingiro ry’ubufatanye bwacu.”
Yunzemo ko amasezerano yasinywe agaragaza ubushake bw’ibihugu byombi mu kurushaho guteza imbere umubano ubyara inyungu.
Icyo gihe Perezida Samia Suluhu we yashimiye Perezida Kagame ku bw’ubutumire, avuga ko amufata nk’umuvandimwe we.
Samia kandi yashimye uburyo Abanyarwanda babaye hafi y’Abanya-Tanzania ubwo bapfushaga Perezida, Dr John Pombe Magufuli, avuga ko “ni ishema rikomeye cyane kuri twe, biratwereka ko u Rwanda ruri hafi ya Tanzania, Tanzania na yo ikaba iri hafi y’u Rwanda.”
Yakomeje agira ati: “Nashakaga gukoresha uyu mwanya mu izina rya Leta n’Abanya-Tanzania bose ngo ntange ubutumwa bwo kubihanganisha mwebwe Perezida, Leta n’abaturage b’u Rwanda kubera amahano ya Jenoside yabaye muri Mata.”
“Ndongera gushimira wowe Perezida Kagame n’abaturage b’u Rwanda muri rusange kuba mwarabanye natwe mu gihe igihugu cyacu cyanyuraga mu kiriyo cyo kubura umuyobozi wacu Dr John Pombe Magufuli wari Perezida wa Tanzania. Turabashimira cyane ku bufatanye no kudufata mu mugongo.”
Samia yavuze ko ibiganiro yagiranye na Perezida Kagame byibanze ku kureba uko ubucuruzi bukorwa hagati y’ibihugu byombi bwatezwa imbere kurushaho.
